Gikalipay pag-ayo sa katawhang Pilipinong nangandoy og hustisya ang pag-aresto ug pagpriso sa kanhing tiranong presidente nga si Rodrigo Duterte sa mga pasilidad sa International Criminal Court (ICC) sa The Netherlands niadtong Marso 11. Usa kini ka dakung kadaugan, dili lamang alang sa mga biktima sa malukpanong mga pagpatay nga gimando ni Duterte ilalum sa “gera kontra-droga,” kundili alang usab sa tanang biktima sa pasistang kadaut ilalum sa iyang teroristang paghari.

Nag-abli kini sa posibilidad nga mapanubag ug masilutan si Duterte sa iyang mga krimen sa katawhan, butang nga halos imposible ilalum sa dunot nga nagharing sistema sa pulitika ug hustisya sa Pilipinas.

Walo ka tuig na ang milabay sukad nga gisugdan ang kaso sa ICC. Labaw pa kining natanggong tungod sa pagbalibad sa rehimeng Marcos nga makigtinabangay sa ICC sukad 2022 tungod sa pakig-alyansa kaniadto ni Marcos sa mga Duterte. Karon nga hingpit nang nabuak ang maong alyansa, miuyon si Marcos nga hatagag dalan ang ICC aron gamiton kini (lakip na ang pagpalagpot kang Sara Duterte) sa paningkamot niyang ikonsolida ang iyang gahum ug tangtangon ang dagkung babag sa laraw niyang palanaton ang paghari lapas sa 2028.

Ang tinuod, bungol pa gihapon si Marcos sa singgit sa katawhan aron panabagon si Duterte sa iyang mga krimen, sama nga bungol siya sa mga singgit alang sa hustisya sa tanang paglapas sa tawhanong katungod sa panahon sa pagharing diktador sa iyang amahan. Ang mga pasistang palisiya sa rehimeng Duterte mao usab ang ginapatuman karon ni Marcos Jr alang sa malukpanong pagpanumpo sa katawhang nakigbisog.

Ginapondohan karon sa mga Duterte ang usa ka sistematiko ug malukpanong kampanya sa disimpormasyon ug pekeng pagbalita sa social media. Aron makuha ang simpatya sa publiko, ginapagawas karon sa kampong Duterte nga “makaluluoy” ug “biktima” sa pulitikanhong pagpamig-ot ang kanhing nangulong pasistang tirano, ug nga ang pag-aresto kaniya lapas sa balaod ug soberanya sa nasud. Ginagamit kini dili isip mga argumento sa ICC, kundili aron sugnuran ang emosyon sa mga maka-Duterte, ug makapatumaw og mga rali.

Gitabunan nila ang liboan ka kalabera sa mga biktima sa pagpamatay atol sa brutal nga paghari ni Duterte. Target sa kumprontasyon ug pagpanghadlok bisan ang mga biktima ug ilang mga pamilya. Ginatago nila ang kamatooran nga gigamit ni Duterte ang gahum sa takuban sa “gubat kontra-droga” aron kontrolon ang suplay sa droga ug mahimong pinakadakung drug lord sa Pilipinas. Ginapapha nila sa panumduman sa katawhan kung paunsa sila labaw pang naglisud ug nag-antus sa mga palisiyang kontra-mamumuo, kontra-mag-uuma, kontra-kabus ug kontra-nasyunal ni Duterte, dungan sa grabeng korapsyon ug pagkawat sa bahandi sa iyang pamilya ug mga alipures.

Layo pa ang pakigbisog sa mga biktima ug katawhang Pilipin sa ICC. Moagi pa kini sa daghang likuong dalan. Angayang awhagon ug tabangan nga magpadayag ug motestigo ang liboan pang biktima ug saksi aron pakusgon ang kaso sa ICC ug ang panawagang silutan si Duterte ug tanan niyang kakunsaba sa ilang mga krimen.

Sa pagtaral kang Duterte sa ICC, nag-abli ang bag-ong natad sa pakigbisog alang sa pagpanubag sa mga maluibong diktador, tirano ug mga naputos-sa-puthaw nga pasista, nga halos imposibleng masilutan ilalum sa mga reaksyunaryong korte sa Pilipinas. Angayan nga suportahan ug pakusgon ang panawagan nga subling magpamyembro ang Pilipinas sa ICC ug iduso ang rehimeng Marcos nga himuon kini. Atubangan sa dili patas nga pagtunhay ug pagpatuman sa balaod sa papet nga estado sa Pilipinas, ang subling pag-apil sa ICC pabor sa liboang biktima sa pasistang pagpanumpo ug terorismo sa estado nga nangandoy og hustisya. Dungan niini, kinahanglang pangandaman ang pagpasaka og mga kaso sa ICC batok kang Marcos, sa mga upisyal sa AFP ug PNP, sa mga kumander sa mga dibisyon ug batalyon, nga tigpasiugda sa mga krimen batok sa katawhan ug krimen sa gubat.

Dungan niini, kinahanglang padayon nga himuon ang malukpanong propaganda ug edukasyon aron iduso ang pagpanubag kang Duterte ug pagpaningil kang Marcos sa nagapadayong pasistang pagpanumpo, pagpalisud-lisud sa katawhan, korapsyon ug pagsunud-sunod sa langyawng imperyalistang interes. “Marcos-Duterte, walay kalainan” sa dagkung krimen sa ekstrahudisyal nga pagpamatay, pagdagit, tortyur, pagpriso ug pagpasaka og hinimu-himong kaso ug pagtanum og ebidensya batok sa katawhang nakigbisog. Kinahanglang padayon nga pakusgon ang pagbatok kang Marcos ug sa mga upisyal sa militar ug pulis nga padayon sa pasistang pagdomina ug pagpanghasi sa katawhan.

“Marcos-Duterte, walay kalainan” sa pagpaantus sa katawhang Pilipino. Walay nausab sa padayon nga na pagsaka sa presyo sa mga palaliton, kaylap nga disempleyo, ug pagtiurok sa ekonomiya sa mayoryang katawhan. Walay nausab sa mga paantus nga palisiya nga milansang sa ubos nga suhulan sa mga mamumuo, binulto nga pag-import og bugas ug uban pang produktong pang-agrikultura sa kaalautan sa lokal nga produksyon, ug pagpabor sa mga langyawng kapitalistang tigpangawkaw sa bahandi sa nasud ug nagaguba sa kinaiyahan. Walay nausab sa walay hunong nga pagpangutang, korapsyon sa mga kontrata sa gubyerno, ismagling, ug sosyohan sa mga kartel ug mga sindikatong kriminal.

“Marcos-Duterte, walay kalainan” sa pagguyod sa Pilipinas sa bangi sa US ug China. Ilalum ni Marcos, labaw nga naghari-hari ang mga pwersang militar sa US sa Pilipinas, ug labaw nga midaku ang hulga nga madamay ang nasud sa imperyalistang gubat, dungan sa nagkadakung papel sa US sa pagsuplay og mga armas ug himan iggugubat sa AFP nga gamit sa pagpanumpo sa katawhan.

Sa kinaulahian, ang tinuod nga kausabang gipangandoy sa katawhan makab-ot lamang pinaagi sa rebolusyonaryong kausaban sa Pilipinas. Padayon nga nagabarog ug nagsukol ang katawhang Pilipinong gipaantus sa imperyalismo, pyudalismo ug burukrata-kapitalismo. Kinahanglang ibagsak ang dunot nga reaksyunaryong neokolonyal nga estado sa dagkung burgesyang kumprador, dagkung agalong yutaan ug burukrata-kapitalista.

Aron makab-ot ang gipangandoy nga hustisya ug tinuod nga kagawasan, kinahanglang kusganong suportahan, iasdang ug pakusgon sa katawhang Pilipino ang armadong pakigbisog sa Bagong Hukbong Bayan. Pinaagi lamang sa pagdaug sa gubat sa katawhan masiguro nga mahatagan og hustisya ang tanang biktima sa pagpangdaugdaug ug pagpahimulos ug mabatunan ang pangandoy nga nasudnong kagawasan, demokrasya ug sosyalistang kaugmaon.