Waray hunong an pangatake han reaksyunaryo nga estado ha kababayin-an ha ngaran han gerra nga kontra-insurhensiya. Yukut-yukot nga kababayin-an an biktima han mga pagtalapas han armado nga mga pwersa hini, labina ha kabaryuhan. Kaparte hira han mga komunidad nga ginhahadi-hadian han militar ngan ginbobomba, ngan iginpapailarum ha blokeyo ngan kontrol.

Tikang han liningkod hi Marcos Jr ha poder, diri mamenos ha 23 nga kababayin-an an ginpatay han mga ahente han estado ha tahub han gerra nga kontra-insurhensiya. Siyam ha ira mga sibilyan nga gin-akusahan nga mga Pula nga mangaraway ngan ginpatay ha hinimu-himo nga mga engkwentro. Kaupod hini hira Jelyn Deomo, Sheryl Dejomo ngan Divina Ajitan nga ginpatay han 96th IB ha Masbate, ngan an mag-iroy nga Cristina Jacolbe ngan iya babaye nga anak nga hi Everlee nga ginpatay han 79th IB ha Negros Oriental. An iba mga Pula nga mangaraway nga nadakop, ginpakurian antes tinuyo nga patayon, sugad kanda Wilma Tiamzon, Hannah Cesista, Annabel Talon, Glorivic Belandres ngan Kaliska Peralta.

Diri mamenos ha 20 nga kababayin-an an ginsikmit han mga ahente ni Marcos Jr. Tulo ha ira, hira Elgene Mungcal, Ma. Elena Pampoza ngan Lyngrace Martullinas, diri pa ginlulutaw hasta yana. Pira ha ira an naka-alinggawas ha kamot han mga sundalo, sugad kanda Jhed Tamano, Jonila Castro, Rowena Dasig ngan Dyan Gumanao. An iba naman sikreto nga iginpriso ha kampo militar sugad kanda Mariel Rebato ngan Monica Ogacho, kaupod an ira mga puya.

Tuyo nga gintatarget han mga sundalo an mga burod o nanganak pa la nga gintatahapan nira nga Pula nga mangaraway o asawa han Pula nga mangaraway agud pwersahon hira nga sumurender ngan an ira mga asawa. Usa hini hi Cherilyn Rebita, nga ginsikmit tikang ha gin-uukyan niya nga balay ngan sikreto nga iginpriso tubtub manganak. Ginkidnap han mga sundalo an iya anak agud pwersahon hiya nga isurender an iya asawa nga usa liwat nga Pula nga mangaraway.

Ha mga komunidad han parag-uma nga gin-okupa han militar, nangunguna an mga sundalo ha kamadarahug kontra ha kababayin-an. Diri mamenos ha walo nga kaso han panlugos an nahireport ha mga komunidad ha Northern Samar, Camarines Norte, Batangas ngan Oriental Mindoro. Menor-de-edad an biktima ha duha nga kaso. Duha naman an nagsumat nga may iba nga sundalo nga nagserbe komo “look out” samtang ginbubuhat an krimen.

Tikang Hulyo 2022 tubtub Enero, diri mamenos ha 27 nga kababayin-an an gin-aresto han rehimen Marcos ha hinimu-himo nga kaso han illegal possession of firearms and explosives ngan igindabi ha armado nga kagiusan. Damo ha ira kalagsan na, sugad kanda Presentacion Saluta, 63; Dolores Rapsing Belibit, 70; Adora Faye de Vera, 66; ngan pinakaurhi hi Myrna Cruz-Abraham, 69. Nakagawas na hira de Vera ngan Cruz-Abraham, kundi mas damo an nagpapabilin nga nakapriso ha magkalain-lain nga parte han nasud.