Haum sa panahon ug puno sa hagit ang pagmantala sa Ulos 2024. Usa gyud diay ka syensya ug arte nga makonsidera ang makapahaum ug makatubag sa mga unsa, ngano ug paunsa sa kasamtangang konteksto sa atong pakigbisog pinaagi sa mga obra nga mga balak, drama, balagtasan, liriko sa kanta, drowing ug dibuho.

Masulting nahimong epektibo ang mga piniling sinulat ug dibuho sa Ulos 2024 tungod kay nakamugna kini og klase-klaseng impak o impresyon sa mga bumabasa. Adunay kurot sa kasingkasing ang mga balak, sulat ug parangal-sugilanon alang sa mga nauna nang kauban nga nahimong “artistiko” ug “mamugnaon” ang kinabuhi tungod sa pagpatuman sa bililhong mga misyon ug katungdanan alang sa nasudnon-demokratikong rebolusyon. Ginadala sa mga pahina niini ang bumabasa sa tiunay nga paglantaw sa lain-laing kontradiksyong personal ug katilingbanon apan sa ulahin napatin-aw niini ang kahusto sa pagpili sa pagsubay sa labaw pa sa kaugalingon nga tinguha sa pagrebolusyon alang sa katawhan ug sa hut-ong.

Nahimong malampuson ang daloy sa mga sinulat ug arteng biswal aron dad-on ang bumabasa sa mas taas nga pagsabot, mas taas nga moral ug mas resolbadong determinasyon aron mahimong tigpasiugda sa kultura sa pagtul-id.

Anaa ingon niining diwa maong padayon ang kampanya ug panawagang basahon ang tibuok libro sa Ulos! Isabay ang pagbasa niini sa mga pagbasa sa mga batakang dokumento nga kailangang tun-an ug tukion. Maayo kaayong gamiton ang mga siniluat isip inspirasyon samtang ginahimo ang mga pulong pagtuki, kumprehensibong pagsumada, pagpuna ug pagpuna-sa-kaugalingon ug uban pang gimbuhaton sa ideolohiya, pulitika ug organisasyon.

Niining panahona, ilabin sa kasyudaran, ang oras nga ginahatag alang sa pagbasa, pagtuki, pagtuon ug gimbuhatong masa nahimong natad na usab sa panagbangi tungod sa kontra-agos nga impluwensya sa dili hustong paggamit sa internet ug social media. Matud pa sa introduksyon sa Ulos 2024, “ang pag-usab sa panghunahuna ug mga gawi, indibidwal ug kolektibo, usa ka gimbuhatong kultural.” Kung kinahanglang mag-umol pag-usab sa paggamit sa internet ug social media, buhaton kini. Kung kinahanglang kritikal nga tul-iron ang mga petibuges nga impluwensya gikan sa lain-laing materyal ug instrumentong nagaatake sa atong proletaryong diwa ug gawi, kinahanglan kining ilampos. Usa ka kulturang mibarog batok sa suhetibismo ug mga petiburges nga panghunahuna ug gawi ang hiniusa natong kritikal ug mamugnaong iasdang!