Miarangkada na ang pinakadagkung war games o pagbansay sa gyera sa imperyalismong US sa rehiyon sa Asia Pacific karong 2025. Gisugdan sa US sa Republic of Korea (ROK) niadtong Marso 10 ang Freedom Shield war games samtang nakatakdang ipahigayon ang pinakadakung Balikatan war games sa Pilipinas sa umalabot nga mga bulan. Ginapahigayon kini dungan sa daghan pang mas gagmayng war games ug aktibidad sa militar sa US sa lain-laing bahin sa rehiyon.

Ang maong mga war games ginapagawas nga mga “ehersisyong pangdepensa” ug pagpakusog sa alyansa. Ang tinuod nga laraw niini mao ang pakusgon ang “interoperability” o kontrol sa mga militar sa US sa mga pwersang militar sa Pilipinas ug ubang nasud. Ginagamit usab kini sa US aron ipabilin ang kontrol sa rehiyon ug labaw pang pakusgon ang tensyon sa karibal niining imperyalistang China ug sa North Korea.

Freedom Shield 25

Dili moubos sa 19,000 ka pwersang militar sa South Korea ug US ang misalmot sa Freedom Shield (FS) 25 nga milungtad og 11 ka adlaw o hangtud Marso 21. Anaa sa 17 ka mga war games, gikan sa 10 ka war games niadtong 2024, ang gilunsad karong tuiga. Naglunsad og lain-laing tipo sa pagbansay militar ang tropa sa US ug South Korea lakip ang mga live-fire (pagkarga sa tinuod nga mga bala o artileriya) exercises sa kayutaan, katubigan ug kahanginan sa nasud.

Ang maong tinuig nga war games ginaila sa Democratic People’s Republic of Korea (DPRK o North Korea) isip “pagpangandam alang sa pagpanakop” sa ilang nasud sa mga pwersang militar sa US ug South Korea. Isip tubag ug pagpakita og determinasyong manalipud sa nasudnong soberanya niini, nagpalupad ang DPRK og mga ballistic missile sa kadagatan

Ayhan ang FS25, daghan na ang gilunsad sa US nga aktibidad militar. Usa dinhi ang gipahigayon niadtong Marso 5, kung asa nabomba sa US ug South Korea ang komunidad sa Nogok-ri, lungsod sa Pocheon, Gyeonggi tungod sa sayop nga mga koordineyt (lokasyon) nga nabutang sa mga kompyuter sa jet fighter. Walo ka bombang MK-82 (500-libras ang gibug-aton) ang “aksidenteng” nahulog sa eroplanong iggugubat.

Dili moubos sa 30 ka sibilyan ang nasamdan sa insidente. daghang mga balay ug bilding ang naguba samtang nakasinati og grabeng troma ug kahadlok ang mga residente.

Mibarog ang meyor sa Pocheon nga dili na dapat maghimo og susamang mga war games sa ilang lungsod hangtud dili masiguro sa militar nga dili na mahitabo ang susamang aksidente. Tulo ka dagkung pasilidad militar, nga langkub ang 4,960 ektaryang yuta, ang anaa sa lungsod sa Pocheon.

Pagpangandam sa Balikatan Exercises “SABAK” 2025

Sa pagsugod pa lang sa 2025, miarangkada na ang pagpangandam sa Armed Forces of the Philippines (AFP) ug mga pwersa sa US alang sa tinuig nga Balikatan war games sa Pilipinas. Nakatakdang ilunsad ang ika-40 nga serye sa Balikatan sa teritoryo sa Pilipinas sa Abril ug Mayo. Gitawag ang Balikatan karong tuiga og SABAK 2025. Gilaumang labwan niini ang 16,000 ka tropang Pilipino ug Amerikano nga misalmot sa miaging tuig.

Sa anunsyo sa AFP, gawas sa pagsalmot sa daku kaayong ihap sa mga sundalo sa US mosalmot usab ang armadong pwersa sa Australia, Japan ug uban pang mga nasud. Niadtong 2024, adunay mga upisyal militar sa 14 ka pang mga nasud ang nagsilbing “obserber” sa war games. Nag-unang ilunsad ang mga war games sa Luzon ug Palawan.

Isip pagpangandam, gilunsad sa AFP ang Combined Arms Training Exercise (CATEX) “Katihan” Battle niadtong Marso 3 hangtud Marso 12. Misalmot dinhi ang 6,000 ka sundalong Pilipino.

Pipila ka serye usab sa mga maniobrang militar ang gilunsad sa Pilipinas uban ang US, Australia, Japan ug Canada sa kadagatan ug kahanginan sa Pilipinas.

Niadtong Pebrero 21, nakigmiting ang hepe sa AFP sa kumander sa US Indo-Pacific Command. Gipahigayon usab ang mga tigum sa AFP sa mga upisyal ug pwersa sa Japan, France, ug Germany sa miaging kwarto.