Usa ka bulang nakighimamat sa usa ka yunit sa Bagong Hukbong Bayan (BHB) sa Southern Tagalog silang Ka Cloud ug Ka Malen isip kabahin sa ilang “tour of duty” o TOD. Ang “TOD,” integrasyon o pakigsandurot mao ang lain-laing tawag sa paglubog sa mga myembro sa rebolusyonaryong organisasyong masa ug Partidista gikan sa kasyudaran ngadto sa BHB aron adunay kongkretong kasinatian sa armadong rebolusyon.

Gikan sa hut-ong petiburges silang Ka Cloud ug Ka Malen. Dili sila anad sa kinabuhi sa bukid. Sagad silang nalisdan, ilabina sa lakawan, apan malipayon gihapon nga nangahas pagpahiuyon sa manera sa hukbo. Misabay sila sa pagbaktas sa subidaon ug ligyas nga tereyn, paggimbuhatong masa, pagbansay militar ug pagpatuman sa mga gimbuhatong teknikal.

Alang kang Ka Cloud, pinakabut-ang tawo nga iyang nailhan ang nakauban nga mga Pulang manggugubat. Iyang nasaksihan ang determinasyon sa mga manggugubat atubangan sa daghang hagit sa kinabuhing gerilya. Nakita niya ang kaseryoso sa Pulang hukbo sa pagsunod sa kalihukang pagtul-id ug pagtikang sa mga kahuyangan.

Samtang nakaintak, nagbansay si Ka Cloud isip upisyal sa lohistika. Nahimong responsibilidad niya ang pag-imbentaryo sa suplay, pagpagana sa kusina ug pagsiguro sa pagkaon sa yunit. Sa buntag pa lang, unang madungog sa kusina ang “Good morning, mga kasama!” ni Ka Cloud.

Daku usab ang pasalamat ni Ka Malen sa pag-abag ug pagsabot sa mga kauban sa iyang mga kalisdanan sa pagpahaum sa kinabuhi sa sona. Nagbansay siya isip giya sa pulitika sa iyang pormasyon. Nakita niya dinhi ang lugar sa panagbangi sa mga ideya ug punahan sa mga kauban sa diwa sa kalihukang pagtul-id. Nakita niya kung paunsa ang pag-abag sa mga kauban sa usag usa.

Sa adlaw sa paghawa sa duha, naglunsad og kapehan ang yunit aron aseson ang ilang pakigsandurot sa hukbo. Bisan og mubo ang ilang integrasyon, nakakutlo og mga leksyon ug inspirasyon pareho ang duha ug ang mga Pulang manggugubat nga nag-atiman kanila. Saad sa duha nga sa ilang pagbalik asamang natarang gerilya, makakuyog sila og uban pang batan-on.

Pamatuod ang kasinatian nilang Ka Cloud ug Ka Malen nga dili babag sa mga rebolusyonaryo sa kasyudaran ang kakulang sa pagbansay aron mahimong Pulang manggugubat. Naghulat ang mga natarang gerilya ug andam ang mga Pulang manggugubat nga mobansay sa mga kabatan-onang lungsod nga mangahas nga mosampa sa hukbong bayan.