Awan sardeng ti panagatake iti reaksyunaryo nga estado kadagiti babbai iti nagan iti gera kontra-insurhensiya. Rinibribu a babbai ti biktima kadagiti panaglabsing dagiti armado a pwersa na daytoy, lallalo iti kaaw-awayan. Paset ida dagiti komunidad nga iturturayan iti militar ken mabombomba, ken ipapauneg iti blokeyo ken kontrol.

Manipud nagtugaw ni Marcos Jr iti poder, saan a bumaba iti 23 babbai ti pinapatay dagiti ahente iti estado iti linged iti gera kontra-insurhensiya. Siyam kadakuada ket sibilyan nga inakusaran a Nalabaga a mannakigubat ken pinapatay kadagiti ar-aramid nga engkwentro. Karaman kadagitoy da Jelyn Deomo, Sheryl Dejomo ken Divina Ajitan a pinapatay iti 96th IB sadiay Masbate, ken iti agina a Cristina Jacolbe ken babai nga anak na a ni Everlee a pinapatay iti 79th IB sadiay Negros Oriental. Ti dadduma ket Nalabaga a mannakigubat a nakemmeg, pinarigatan sakbay nga inggagara a pinapatay kas kada Wilma Tiamzon, Hannah Cesista, Annabel Talon, Glorivic Belandres ken Kaliska Peralta.

Saan a bumaba iti 20 babbai ti dinukot dagiti ahente ni Marcos Jr. Tallo kadakuada, da Elgene Mungcal, Ma. Elena Pampoza ken Lyngrace Martullinas, ket saan pay nga nailung-aw inggana ita. Sumagmamano kadakuada iti nakawaya iti ima dagiti soldado, kasla kada Jhed Tamano, Jonila Castro, Rowena Dasig ken Dyan Gumanao. Ti dadduma met ket limed nga naibalud iti kampo militar kas kada Mariel Rebato ken Monica Ogacho, kadua dagiti kaipaspasngay nga annak da.

Inggagara a tartargeten dagiti soldado dagiti masikog wenno barbaro laeng a naganak a pagat-atapan da a Nalabaga a mannakigubat wenno asawa iti Nalabaga a mannakigubat tapno mapwersa da a sumuko ken dagiti assawa da. Maysa ditoy ni Cherilyn Rebita, a dinukot manipud iti pagtartarusan na a balay ken limed nga naipupok inggana naganak. Kinidnap dagiti soldado ti anak na tapno pwersaren da isuna nga isuko na ni lakay na a maysa met laeng a Nalabaga a mannakigubat.

Kadagiti komunidad iti mannalon nga ok-okuparen dagiti militar, mangisungsungsong dagiti soldado iti kinaranggas kontra kadagiti babbai. Saan a bumaba iti walo a kaso iti panangrames iti naiyulat kadagiti komunidad iti Northern Samar, Camarines Norte, Batangas ken Oriental Mindoro. Menor-de-edad ti biktima iti dua a kaso. Dua met ti nagreport nga adda sabali a soldado a nagbalin a “look out” bayat nga iyar-aramid ti krimen.

Manipud Hulyo 2022 inggana Enero, saan a bumaba iti 27 babbai ti inaresto iti rehimen Marcos gapu iti parparbo a kaso iti illegal possesion of firearms and explosives ken insilpo iti armado a tignayan. Adu kadakuada ket babbaketen a kas kada Presentacion Saluta, 63; Dolores Rapsing Belibit, 70; Adora Faye de Vera, 66; ken kaudian, ni Myrna Cruz-Abraham, 69. Da de Vera ken Cruz-Abraham ket nakaruaren, ngem ad-adu ti nakabalud pay laeng iti naduma-duma a suli iti pagilian.