Ibalik ang mga tahungan sa Navotas. Miadto sa city hall sa Navotas ang mga mangingisda ug magtatahong ilalum sa Pamalakaya niadtong Marso 14, aron iduso sa lokal nga gubyerno nga tugutan silang ibalik ang ilang mga tahungan. Niining adlawa usab niadtong milabayng tuig, gidemolis sa gubyerno ang ilang mga tahungan sa takuban sa “rehabilitasyon” sa Manila Bay. Kapin 200 ka tahungan ang gidemolis niadtong milabayng tuig aron hatagag dalan ang 650-ektaryang proyektong reklamasyon sa San Miguel Corporation sa Navotas.

Hustisya alang sa mga residente sa Balubad. Nagmartsa sa Angeles City sa Pampanga ang mga residente sa Sityo Balubad, Barangay Anunas niadtong Marso 12 aron manawagan og hustisya sa bangis ug iligal nga demolisyon sa ilang komunidad niadtong Marso 12, 2024. Sa demolisyon niadtong miaging tuig, 600 ka pamilya ug 48 ka mag-uumang benepisyaryo sa certificate of land ownership award ang gipalayas gikan sa ilang yuta.

Mga konsyumer batok sa mahal nga presyo. Gimakmak sa protesta sa lain-laing mga grupong kabahin sa Samahan ug Ugnayan ng mga Konsyumer Para sa Ikauunlad ng Bayan (Suki Network) niadtong Marso 14 ang mga merkado sa Metro Manila aron ipanawagan ang pagpaubos sa presyo sa pagkaon, palaliton ug mga yutilidad. Aduna usay laing protesta ang kabatan-onang estudyante uban ang mga mamumuo aron babagan ang pagsaka sa singil sa plitihan sa tren.