Duha ka kaso sa pekeng engkwentro ang nataho sa Mindoro ug Negros sulod lamang sa usa ka semana kung asa tulo ang gipatay sa mga sundalo sa Armed Forces of the Philippines (AFP). Dayag nga paglapas sa internasyunal nga makitawhanong balaod ug lagda sa gubat ang tinuyong pagpatay sa AFP sa mga biktima.

Sa Negros Occidental, gidagit sa mga ahente sa Crime Investigation and Detection Group silang Noynoy Ponteras (Ka Jojo) ug Marisa Pobresa (Ka Kim) niadtong Marso 7, alas-7 sa gabii, sa usa ka barangay sa Bacolod City. Pagkaugma, gipagawas nga sila napatay sa usa ka armadong engkwentro sa AFP ug Bagong Hukbong Bayan (BHB) sa Sityo Paraiso, Barangay Caduhaan, Cadiz City. Matud sa BHB-Negros Island (Apolinario Gatmaitan Command), gitoryur ang duha ayha tinuyong gipatay.

Sa Oriental Mindoro, gipanghimakak sa BHB-Mindoro (Lucio de Guzman Command) nga Pulang manggugubat ang ginasulti sa 4th IB nga napatay kini sa usa ka “engkwentro” niadtong Marso 14 sa Sityo Cabuyao, Barangay Panaytayan, Mansalay. Matud sa hukbong bayan, walay yunit o elemento sa BHB sa maong barangay sa maong panahon. Wala pa naila ang maong biktima.

Sa parehong insidente, gipagawas sa AFP nga adunay nasakmit nga mga armas, bala ug eksplusibo gikan sa mga biktima.

Pag-aresto. Giaresto ug gisulayan pagtago sa mga pwersa sa 3rd Special Forces Battalion ang lider-Lumad Manobo nga si Michelle Campos ug tulo pa niyang kauban. Nagabyahe sila niadtong Marso 5 sa gabii sa Barangay Das-agan, San Francisco, Agusan del Sur. Nakaestroya lamang sila sa mga grupo sa tawhanong katungod niadtong Marso 11 sa usa ka ospital sa Prosperidad.

Samtang, wala pa gihapon nakaplagan ang lokasyon sa lider-Lumad nga si Genasque Enriquez nga giaresto niadtong Marso 2. Silang Campos ug Enriquez mga iladong tigpanalipud sa katungod sa ilang komunidad sa Lianga, Surigao del Sur batok sa dagkung korporasyon sa mina ug pagtroso.

Pagpanakit. Gidakop ug gikulata sa 94th IB si Alberto Piaduche niadtong Marso 9 sa gabi samtang sakay sa motorsiklo sa Sityo Tuyuman, Barangay Caradio-an, Himamaylan City sa pasangil nga sila mga myembro sa BHB. Kauban niya kaniadto ang usa ka paryente. Matud sa taho, pugos nga gipasakay sa usa ka pick-up truck ang duha ug gidala sulod sa hedkwarters sa militar. Didto gikulata si Piaduche ug gipaangkon nga adunay kalambigitan sa hukbong bayan. Gibuhian sila sa tungang gabii.