Napapanahon gud ngan mapan-ayat an pagpagawas han Ulos 2024. Tinuod man gud nga usa nga syensiya ngan arte na gihapon nga makukunsidera an makahaum ngan makabaton ha mga ano, kay ano ngan tiunan-o han presente nga konteksto han aton pakig-away pinaagi han mga obra nga mga siday, drama, ismayling, karantahon, drowing ngan dibuho.

Masesering nga nagin epektibo an mga pinili nga sinurat ngan drowing ha Ulos 2024 tungod kay nakahimo ini hin dirudilain nga epekto o impresyon ha mga mambarasa. Mayda kubot ha kasingkasing an mga siday, surat ngan sanaysay-pagpasidungog para ha mga nahiuna na nga kasama nga nagin “arte” ngan “mahimuon” an kinabuhi tungod ha pagpatuman han diri mamemenos nga mga misyon ngan buruhaton para ha nasyunal-demokratiko nga rebolusyon. Gindadara han mga paypay hini an mambarasa ha tangkod nga pagtan-aw ha magkalain-lain nga personal ngan pankatilingban nga kontradiksyon kundi ha urhi nahieeksplikar hini an katukmaan han pagpili han paghasog ha labaw-ha-kalugaringon nga hingyap han pagrerebolusyon para ha katawhan ngan ha klase.

Nagin madinaugon an agos han mga sinurat ngan arte-biswal para dad-on hini an mambarasa ha mas hitaas nga pagsantop, mas hitaas nga moral ngan mas resolbado nga determinasyon para magin tagapagpasulong han kultura han pagtutul-id.

Ha sugad hini nga diwa amo nga kinahanglan dirudiretso an kampanya ngan panawagan nga basahon an bug-os nga libro han Ulos! Idungan an pagbasa hini ha mga pagbasa ha mga batakan nga dokumento nga kinahanglan adman ngan analisaron. Maupay gud nga gamiton an mga obra komo inspirasyon samtang iginhihimo an mga SI miting, pagbubug-os han mga sumada, pagsuson ngan pagsuson-ha-kalugaringon ngan iba pa nga buruhaton ha ideolohiya, pampulitika ngan organisasyon.

Yana nga panahon, labina ha kasyudaran, an oras nga ginhahatag para ha pagbasa, pag-analisar, kolektibo nga pag-aram ngan buruhaton masa nagigin natad na gihapon han sumpakiay tungod ha kontra-agos nga impluwensya han diri tukma nga paggamit ha internet ngan social media. Sigon pa ha pasiuna nga pamulong han Ulos 2024, “an pagbag-o han panhunahuna ngan mga higwaos, indibidwal ngan kolektibo, usa nga buruhaton pankultura.” Kun kinahanglan magremolde ha paggamit han internet ngan social media, himuon ini. Kun kinahanglan kritikal nga igsalikway an mga petibuges nga impluwensya tikang ha magkalain-lain nga materyal ngan instrumento nga naatake ha aton proletaryo nga diwa ngan higwaos, kinahanglan ini igdaug. Usa nga kultura nga naninindugan kontra ha suhetibismo ngan mga petiburges nga panhunahuna ngan higwaos an duruyog naton nga kritikal ngan mahimuon nga ipasulong!