Naduso han 74 kaoras nga welga han Nexperia Philippines Inc. Workers Union an kapitalista nga multinasyunal nga kompaniya nga hatagan han konsesyon an mga trabahador ha pakigtawaray hini para ha bag-o nga Collective Bargaining Agreement (CBA). Nasul-an an kapitalista kahuman umabot ha gintatantiya nga ₱1.26 kabilyon an nawara nga kita han kompaniya durot han welga tikang Marso 5 han kulop tubtub Marso 8.

Gintapo han suporta an mga welgista han igkasi trabahador ngan iba nga organisasyon ha gawas han Light Industry and Science Park 1 ha Cabuyao City, Laguna. Nakab-ot han unyon an pagpabalik ha trabaho ha tagapangulo han NPIWU nga hi Mary Ann Castillo ngan usa pa nga upisyal han unyon nga gintanggal. Nakuha liwat han unyon an dugang nga ₱17 kada adlaw para ha 2024, ₱19 para ha 2025, ₱21 para ha 2026 ngan ₱20,000 nga signing bonus. Klaro liwat nga nakasurat ha kasarabutan nga igindidiri an bisan ano nga pitad-nga-pagbulos ha mga trabahador nga pinartisipar ha welga.

Sigon kan Castillo, madinaugon an ira welga tungod kay damo an napukaw ha kamutangan han mga trabahador ha Nexperia ngan nakig-usa ha ira pakigbisog. Dugang pa niya, kinusog an kaburut-on han mga unyonista ngan andam hira nga dugang pa nga umato para ha ira mga katungod.