Binuylo na an pinakadagko nga war games o treyning ha gerra han imperyalismo nga US ha rehiyon han Asia Pacific yana nga 2025. Gintikangan han US ha Republic of Korea (ROK) hadton Marso 10 an Freedom Shield war games samtang nakatalaan nga himuon an pinakadako nga Balikatan war games ha Pilipinas ha tiarabot nga mga bulan. Hihimuon ini kadungan han damo pa nga mas gudti nga war games ngan aktibidad han militar han US ha magkalain-lain nga dapit han rehiyon.

Ini nga mga war games ginpapagawas nga mga “pandepensa nga ehersisyo” ngan pagpakusog han alyansa. An tinuod nga katuyuanan hini amo an pakusgon an “interoperability” o kontrol han mga militar han US ha mga pwersa militar han Pilipinas ngan iba nga nasud. Gin-gagamit liwat ini han US agud igpabilin an kontrol ha rehiyon ngan dugang pa nga papintason an tensyon ha kasumpaki hini nga imperyalista nga nasud nga China ngan ha North Korea.

Freedom Shield 25

Diri mamenos ha 19,000 nga pwersa militar han South Korea ngan US an pinartisipar ha Freedom Shield (FS) 25 nga linastar hin 11 kaadlaw o tubtub Marso 21. Aada ha 17 nga tinig-ob nga mga war games, tikang ha 10 nga war games hadton 2024, an iginlansar yana nga tuig. Naglansar hin magkalain-lain nga tipo hin panmilitar nga pagpahiara an tropa han US ngan South Korea kalakip an mga live-fire (pag-load hin tinuod nga mga bala o artileri) exercises ha katunaan, katubigan ngan kahanginan ha nasud.

Ini nga tinuig nga war games iginkukunsidera han Democratic People’s Republic of Korea (DPRK o North Korea) komo “pangandam para ha pagsakop” ha ira nasud han mga pwersa militar han US ngan South Korea. Komo baton ngan pagpakita han determinasyon nga magdepensa ha nasyunal nga soberaniya hini, nagpalupad an DPRK hin mga ballistic missile ha kadagatan.

Antes an FS25, wala-tuo na an iginhimo han US nga panmilitar nga aktibidad. Usa hini an ginhimo hadton Marso 5, diin nabomba han US ngan South Korea an komunidad ha Nogok-ri, bungto han Pocheon, Gyeonggi tungod ha sayop nga mga koordineyt (lokasyon) nga nahibutang ha mga kompyuter han jet fighter. Walo nga bomba nga MK-82 (may bug-at nga 500-libras) an “aksidente” nga nahulog han pan-gerra nga edro.

Diri mamenos ha 30 nga sibilyan an nasamaran ha insidente. Damo nga kabablayan ngan bilding an naruba samtang nahiagum hin sobra nga ugmad ngan kahadlok an mga residente.

Nanindugan an meyor han Pocheon nga diri na angay maghimo hin sugad nga mga war games ha ira bungto tubtub nga diri naseseguro han militar nga diri na mauutro an kapareho nga aksidente. Tulo nga dagko nga panmilitar nga pasilidad, nga lupgop an 4,960 kaektarya nga tuna, an aada ha bungto han Pocheon.

Pangandam ha Balikatan Exercises “SABAK” 2025

Ha pagtikang pa la han 2025, binuylo na an pangandam han Armed Forces of the Philippines (AFP) ngan mga pwersa han US para ha tinuig nga Balikatan war games ha Pilipinas. Nakatalaan nga ilansar an ika-40 nga serye han Balikatan ha teritoryo han Pilipinas ha Abril ngan Mayo. Gin-ngaranan an Balikatan yana nga tuig komo SABAK 2025. Ginlalauman nga lalabawan hini an 16,000 nga tropa nga Pilipino ngan Amerikano nga pinartisipar ha nakalabay nga tuig.

Ha anunsyo han AFP, labot ha pagpartisipar han dako kaupay nga ihap han mga sundalo han US mapartisipar liwat an armado nga pwersa han Australia, Japan ngan iba pa nga mga nasud. Hadton 2024 mayda mga upisyal militar han 14 pa nga mga nasud an nagserbe nga “tag-obserbar” ha war games. Prinsipal nga hihimuon an mga war games ha Luzon ngan Palawan.

Komo pangandam, ginlansar han AFP an Combined Arms Training Exercise (CATEX) “Katihan” Battle hadton Marso 3 tubtub Marso 12. Pinartisipar hini an 6,000 nga sundalo nga Pilipino.

Pira kahugna liwat han mga panmilitar nga mainobra an iginlansar han Pilipinas kaupod an US, Australia, Japan ngan Canada ha kadagatan ngan kahanginan han Pilipinas.

Hadton Pebrero 21, nakipagmiting an hepe han AFP ha kumander han US Indo-Pacific Command. Iginlansar liwat an mga miting han AFP ha mga upisyal ngan pwersa han Japan, France, ngan Germany ha naglabay nga kwarter.