Duha nga kaso han buwa nga engkwentro an nahilista ha Mindoro ngan Negros ha sakob la han usa kasemana kun diin tulo an ginpatay han mga sundalo han Armed Forces of the Philippines (AFP). Butad nga pagtalapas ha internasyunal nga makatawo nga balaud ngan palisiya han gerra an tuyo nga pagpatay han AFP ha mga biktima.

Ha Negros Occidental, ginsikmit han mga ahente han Crime Investigation and Detection Group hira Noynoy Ponteras (Ka Jojo) ngan Marisa Pobresa (Ka Kim) hadton Marso 7, alas-7 han gab-i, ha usa nga barangay ha Bacolod City. Kinabuwasan, ginpagawas hira nga napatay ha usa nga armado nga engkwentro han AFP ngan Bagong Hukbong Bayan (BHB) ha Sityo Paraiso, Barangay Caduhaan, Cadiz City. Sigon ha BHB-Negros Island (Apolinario Gatmaitan Command), ginpailarum an duha ha tortyur antes hira tuyo nga ginpatay.

Ha Oriental Mindoro, ginpahimuwa han BHB-Mindoro (Lucio de Guzman Command) nga Pula nga mangaraway an ginsesering han 4th IB nga napatay hini ha usa nga “engkwentro” hadton Marso 14 ha Sitio Cabuyao, Barangay Panaytayan, Mansalay. Sering han hukbo han katawhan, waray yunit o elemento han BHB ha nasering nga barangay hiton nga higayon. Waray pa matudlok an pangilal-an han biktima.

Ha pareho nga insidente, ginpagawas han AFP nga mayda nakumpiska nga mga armas, bala ngan paburuthon tikang ha mga biktima.

Pag-aresto. Gin-aresto ngan gin-atentar nga itago han mga pwersa han 3rd Special Forces Battalion an lider-Lumad Manobo nga hi Michelle Campos ngan tulo pa niya nga kaupod. Nagbibiyahe hira hadton gab-i han Marso 5 ha Barangay Das-agan, San Francisco, Agusan del Sur. Nakaestorya la hira han mga grupo ha tawhanon ng katungod hadton Marso 11 ha usa nga hospital ha Prosperidad.

Samtang, waray pa liwat matatad-i an kinamumutangan han lider-Lumad nga hi Genasque Enriquez nga gin-aresto hadton Marso 2. Hira Campos ngan Enriquez mga kilalado nga tag-undong han katungod han ira komunidad ha Lianga, Surigao del Sur kontra ha dagko nga korporasyon han pagmimina ngan pagtotroso.

Pangastigo. Gindakop ngan ginkastigo han 94th IB hi Alberto Piaduche hadton gab-i han Marso 9 samtang sakay han motorsiklo ha Sityo Tuyuman, Barangay Caradio-an, Himamaylan City ha tahap nga membro hira han BHB. Kaupod niya hadto an usa nga paryente. Sigon ha report, pirit nga ginpasakay an duha ha usa nga pick-up truck ngan gindara ha sakob han hedkwarters han militar. Didto ginkastigo hi Piaduche ngan ginpapatuga nga may sumpayan ha hukbo han katawhan. Ginbuhian hira han magkatutnga han kagab-ihon.