Igpabalik an mga tahungan ha Navotas. Kinadto ha city hall han Navotas an mga parupangisda ngan paragtahong ha ilarum han Pamalakaya hadton Marso 14, agud ig-insister ha lokal nga gubyerno nga tugutan hira nga igpabalik an ira mga tahungan. Ha pareho nga adlaw hadton nakalabay nga tuig, gindemolis han gubyerno an ira mga tahungan ha tahub han “rehabilitasyon” han Manila Bay. Masobra 200 nga tahungan an gindemolis hadton nakalabay nga tuig agud lugwayan an 650-kaektarya nga proyekto nga reklamasyon han San Miguel Corporation ha Navotas.

Hustisya para ha mga residente ha Balubad. Nagmartsa ha Angeles City ha Pampanga an mga residente han Sityo Balubad, Barangay Anunas hadton Marso 12 agud manawagan han hustisya ha madarahug ngan iligal nga demolisyon ha ira komunidad hadton Marso 12, 2024. Ha demolisyon hadton nakalabay nga tuig, 600 kapamilya ngan 48 nga parag-uma nga benepisyaryo han certificate of land ownership award an ginpalayas tikang ha ira tuna.

Mga konsyumer kontra ha higtaas ngan presyo. Gintapo hin protesta han magkalain-lain nga mga grupo nga kaparte han Samahan at Ugnayan ng mga Konsyumer Para sa Ikauunlad ng Bayan (Suki Network) hadton Marso 14 an mga merkado ha Metro Manila agud igpanawagan an pagpamenos ha presyo han pagkaon, papliton ngan mga yutilidad. Nagkamayda liwat hin bulag nga protesta an kabatan-unan nga estudyante kaupod an mga trabahador agud tipahan an paghitaas han sukot ha pasahe ha tren.