Sagadsaden nga impatungpal iti kadadakkelan a war games wenno panagsanay iti gera ti imperyalismo nga US iti rehiyon ti Asia Pacific ita nga 2025. Rinugian ti US iti Republic of Korea (ROK) idi Marso 10 ti Freedom Shield war games kabayatan a naikeddeng nga aramiden ti kadakkelan a Balikatan war games ti Pilipinas iti sumarsarunon a bulan. Aramiden dagitoy kagiddan ti adu pay a babassit a war games iti naduma-duma nga a ti rehiyon.

Dagitoy a war games ket parparuaren na nga dagiti “ehersisyo a pangdepensa” ken panangpabileg iti alyansa. Ti pudno a panggep dagitoy ket panangpabileg iti “interoperability” wenno kontrol dagiti militar ti US kadagiti pwersa militar ti Pilipinas ken sabali a pagilian. Us-usaren daytoy ti US tapno mapatalinaed ti kontrol iti rehiyon ken lalo pay nga pairtengen ti tensiyon ti kasupiat daytoy nga imperyalista a pagilian a China ken iti North Korea.

Freedom Shield 25

Saan a bumaba iti 19,000 a pwersa iti militar ti South Korea ken US ti limmaok iti Freedom Shield (FS) 25 nga nagbayag iti 11 nga aldaw wenno agingga iti Marso 21. Adda ti 17 nagduduma a war games, manipud iti 10 war games idi 2024 ti inrusuat ita nga tawen. Nangirusuat iti naduma-duma nga tipo ti panagsanay militar ti tropa ti US ken South Korea mairaman dagiti live-fire (panagkarga ti pudno a bala wenno artillera) ehersisyo iti kadagaan, kadanuman ken iti tangatang ti pagilian.

Iti tinawen a war games na daytoy ket maibilbilang ti Democratic People’s Republic of Korea (DPRK o North Korea) kas “panagsagana para iti panangsakop” dagiti pwersa militar ti US ken South Korea iti pagilian da. Kas sungbat iti panangipakpakita iti determinasyon a mangidepensa iti nailian a soberenya daytoy, nangipatayab ti DPRK kadagiti ballistic misayl iti baybay. Sakbay iti FS25, agsusumbangiren iti irusrusuat ti US nga aktibidad ti militar. Maysa daytoy iti inrusuat da idi March 5, no sadino ket nabomba ti US ken South Korea ti komunidad iti Nogokri, ili ti Gyeonggi gapu ta kamali dagiti koordineyt (lokasyon) nga nakalanad kadagiti kompyuter ti jet fighter. Walo a bomba nga MK-82 (addaan dagsen nga 500-libras) ti “aksidente a naitinnag dagiti eroplano a panggubat.

Saan a bumaba iti 30 a sibilyan ti nadunor iti dayta nga insidente. Adu a balbalay ken pasdek ti nadadael kabayatan nga nangisagmak iti napalalo a trauma ken buteng kadagiti residente.

Impetteng ti mayor iti Pocheon nga saanen a kasapulan nga agirusuat kadagiti kapada na nga war games iti ili da inggana a saan a masigurado ti militar a saan a mapasamak manen ti kapada nga aksidente. Tallo a dadakkel a pasilidad militar, 4,960 ektarya ti kalawa na iti adda iti ili ti Pocheon.

Panagsagana iti Balikatan Exercises “SABAK” 2025

Karugrugi pay laeng ti 2025, sagadsaden ti panagsagana ti Armed Forces of the Philippines (AFP) ken dagiti pwersa ti US para iti tinawen a Balikatan war games iti Pilipinas. Naikeddeng nga irusuat ti maika-40 serye ti Balikatan iti teriroryo ti Pilipinas iti Abril ken Mayo. Inawagan ti Balikatan ita a tawen bilang SABAK 2025. Manamnama nga mas ad-adu pay daytoy iti 16,000 a tropa ti Pilipino ken Amerikano nga limmaok iti napalabas a tawen.

Iti anunsyo ti AFP, malaksid ti pannakipaset, dagiti ad-adu a soldado nga US ket lumaok met ti armado a pwersa ti Australia, Japan ken dadduma pay a pagilian. Idi 2024 ket adda dagiti opisyal militar ti 14 pay a pagilian ti nagserbi a “nagpaliiw”iti war games. Kangrunaan nga irussuat dagiti war games iti Luzon ken Palawan.

Kas panagsagana, inrussuat ti AFP ti Combined Arms Training Exercise (CATEX) “Katihan” Battle idi Marso 3 agingga ti Marso 12. Limmaok ti 6,000 soldado a Pilipino.

Mano a serye met dagiti maniobra militar ti inrussuat ti Pilipinas karaman ti US, Australia, Japan ken Canada iti taaw ken tangatang ti Pilipinas.

Idi Pebrero 21, nakipagmiting ti hepe ti AFP iti kumander ti US Indo-Pacific Command. Inrussuat met dagiti miting ti AFP kadagiti opisyal ken pwersa ti Japan, France, ken Germany iti napalabas a kwarto.