Makabulan a naikuyog iti maysa a yunit ti New People’s Army (NPA) iti Akin-abagatan a Katagalogan da Ka Cloud ken Ka Malen kas paset ti “tour of duty” wenno TOD da. Ti “TOD,” integrasyon wenno pannakipagbiag ket nagduduma nga awag iti pannakilaok dagiti kameng ti rebolusyonaryo nga organisasyon ti masa ken Partidista manipud syudad iti NPA tapno maaddaan ti kongkreto a kapadasan iti armado a rebolusyon.

Naggapu iti dasig a petiburges da Ka Cloud ken Ka Malen. Saan da a naruam ti biag iti kabambantayan. Masansan a marigatan da, aglalo iti pannagna, ngem naragsak da latta ken natured a nakaannatup iti manera ti hukbo. Nakasurot da iti panagdaliasat iti natatayag ken nagalis a tereyn, trabaho iti masa, militar a panagsanay ken panangtaming kadagiti teknikal a trabaho.

Para ken ni Ka Cloud, kasasayaatan a tao a naam-ammo ken nakapulapol na dagiti Nalabaga a mannakigubat. Naimatangan na iti kina-mapangngeddeng dagiti mannakigubat iti sanguanan ti adu a karit iti gerilya a panagbiag. Nakita na ti kinaseryoso dagiti Nalabaga a mannakigubat iti panagtulnog ti tignayan a panagilinteg ken panagringbaw kadagiti kakapuyan.

Bayat a nakasilpo, nagsursuro ni Ka Cloud kas opisyal iti lohistika. Nagbalin a responsibilidad na ti panagimbertaryo ti suplay, panangtarawidwid ti kusina ken panangsigurado ti makan iti yunit. Bigbigat pay laeng ket maipasabat iti kusina ti “Good morning kakadua!” ni Ka Cloud.

Napnuan met ti panagyamyaman ni Ka Malen iti panangtarabay ken pannakaawat dagiti kakadua ti pakarigatan na nga umannatup ti biag iti sona. Nagsursuro isuna kas tarabay ti pampulitika iti pormasyon na. Ditoy a nakita na ti lugar dagiti risiris ti kaammuan ken panagdidinnillaw dagiti kakadua iti pakinakem iti tignayan a panagilinteg. Nakita na no kasano ti panagtitinnulong tunggal maysa dagiti kakadua.

Iti aldaw nga ipapanaw dagiti dua, nangirussuat iti kapihan ti yunit tapno ragupen ti pannakipagbiag da iti hukbo. Uray ababa laeng ti panagtalinaed da, nakaadaw kadagiti adal ken inspirasyon dagiti dua ken dagiti Nalabaga a mannakigubat a nangpasangbay kadakuada. Inkari dagiti dua nga iti panagsubli da sadinoman a larangan gerilya, ket mangikuyog da ti dadduma pay nga agtutubo.

Pammaneknek ti kapadasan da Ka Cloud ken Ka Malen a saan a lapped kadagiti rebolusyonaryo ti syudad ti kinakurang ti kabaelan tapno agbalin a Nalabaga a mannakigubat. Agur-uray dagiti larangan gerilya ken nakasagana dagiti Nalabaga a mannakigubat a mangsursuro kadagiti agtutubo iti syudad a natured a lumaok iti soldados ti umili.