Naiduron babaen ti 74 oras a welga ti Nexperia Phillippines Inc. Workers Union ti kapitalista iti kumpanya a multinasyunal nga ited ti konsesyon dagiti mangmangged iti pannakitinnawar daytoy para iti collective bargaining agreement (CBA). Nagannay ti kapitalista kalpasan a dimmanon ti agarup ₱1.26 bilyon ti napukaw a kita ti kumpanya gapu iti welga manipud malem ti Marso 5 inggana Marso 8.

Sinabat ti suporta dagiti nagwelga dagiti kapada da a mangmangged ken dadduma pay nga organisasyon iti ruar ti Light Industry Park /1 iti Cabuyao City, Laguna. Naragpat ti unyon iti panangisubli iti trabaho ti pangulo iti NPIWU nga ni Mary Ann Castillo ken maysa pay nga opisyal ti unyon nga naikkat. Naala ti unyon ti nayon a ₱17 kada aldaw iti 2024, ₱19 iti 2025, ₱21 para iti 2026 ken ₱20,000 signing bonus. Nalawag met laeng nga nakalanad iti katulagan nga ipaw-pawil ti aniaman nga addang a panagibales kadagiti mangmangged a lumaok iti welga.

Segun ken Castillo, naballigi ti welga gapu ta adu ti namulat iti kasasaad dagiti mangmangged iti Nexperia ken nakipagkaykaysa iti laban. Innayon na pay, pimmigsa iti pakinakem dagiti unyonista ken nakasagana da nga mangirupir para kadagiti karbengan da.