Dua a kaso ti peke nga engkwentro iti nairekord ti Mindoro ken Negros iti uneg laeng ti makalawas no sadino ket tallo iti pinapatay dagiti soldado ti Armed Forces of the Philippines (AFP). Nakaro a panaglabsing iti internasyunal a makatao a linteg ken pagannurutan ti gubat iti naiplano a panangpapatay ti AFP kadagiti biktima.

Iti Negros Occidental, innala dagiti ahente ti Crime Investigation ang Detection Group da Noynoy Ponteras (Ka Jojo) ken Marisa Pobresa (Ka Kim) idi Marso 7, alas-7 ti rabii, iti maysa a barangay iti Bacolod City. Kinabigatan, kinuna da a natay dagitoy ti maysa nga armado nga enkwentro ti AFP ken New People’s Army (NPA) iti Sityo Paradiso, Barangay Caduhaan, Cadiz City. Segun iti BHB-Negros Island (Apolinario Gatmaitan Command), ti dua ket tinortyur sakbay da a pinatay dagitoy.

Iti Oriental Mindoro, sinalungasing ti BHB-Mindoro (Lucio de Guzman Command) a nalabaga a mannakigubat iti ibagbaga ti 4th IB a napatay dagitoy iti maysa nga “engkwentro” idi Marso 14 iti Sitio Cabuyao, Barangay Panaytayan, Mansalay. Kuna ti NPA, awan yunit wenno elemento ti NPA iti nasao a barangay iti dayta a tiempo. Saan pay a nabigbig ti kinatao dagiti biktima.

Iti isu met laeng nga insidente, pinaruar ti AFP nga adda nasamsam nga armas, bala ken pangpasabog manipud kadagiti biktima.

Panagaresto. Inaresto ken ginandat nga ilemmeng dagiti pwersa ti 3rd Special Forces Batalion ti lider-Lumad Manobo nga ni Michelle Campos ken tallo pay a kaduana. Agbibiyahe da iti rabii ti Marso 5 iti Barangay Das-agan, San Francisco, Agusan del Sur. Nakasarita laeng isuda dagiti grupo ti karapatang-tao idi March 11 iti maysa nga ospital iti Prosperidad.

Kabayatanna, saan pay nga nasapulan iti ayan ti lider-Lumad nga ni Genasque Enriquez nga inaresto idi Marso 2. Da Campos ken Enriquez ket nalatak a mangitantandudo ti karbengan ti komunidad da iti Lianga, Surigao del Sur laban iti dadakkel a korporasyon ti panagminas ken panagtroso.

Panangkabil. Kinemmeg ken kinabil ti 94th IB ni Alberto Piaduche idi Marso 9 ti rabii kabayatan a nakalugan iti motorsiklo iti Sityo Tuyuman, Barangay Caradio-an, Himamaylan City iti panangipagarup nga isuda ket miyembro ti NPA. Kakuyog idi ti maysa a kabagian na. Segun iti report, dagiti dua ket pinilit nga pinalugan iti maysa a pik-ap trak ket impan iti uneg ti hedkwarters ti militar. Idiay nga kinabil da ni Piaduche ken pinapaamin nga adda pakainaigan na iti NPA. Tengngan ti rabii idi pinalubusan da ida.