Napalaos la unay ti kinaragsak iti umili a Pilipino nga agtartarigagay iti hustisya ti panangtiliw ken panangibalud iti sigud a daulo a tirano a ni Rodrigo Duterte kadagiti pasilidad iti International Criminal Court (ICC) iti pagilian a The Netherlands idi Marso 11. Maysa daytoy a balligi saan laeng kadagiti biktima iti nasaknap a pammapatay nga inmandar ni Duterte iti bala-bala iti “gera iti droga,” nu di ket para kadagiti amin a biktima iti pasista a panagraut panagpagunggan na iti sidong iti terorista a panagturay na.

Luklukatan daytoy ti posibilidad a sungbatan ken madusa ni Duterte kadagiti krimen na iti sangkataoan, banag a dandani imposible iti sidong iti nalungsot bulok nga agturturay a sistema iti pulitika ken hustisya iti Pilipinas.

Walo tawenen ti napalabas sipud rinugian ti ICC ti kaso na. Nakaro pay ti pannakaitantan na gapu iti panagkedked iti rehimen Marcos a makitinnulong iti ICC manipud 2022 gapu iti pannaki-alyansa na idi kadagiti Duterte. Gapu ta napugasen daytoy nga alyansa a pinalubusan ni Marcos ti ICC tapno mausar daytoy (uray pay iti panangpatakyas kenni Sara Duterte) iti panangikagumaan na nga ikonsolida ti bileg na ken ikkaten ti dadakkel a lapped iti panggep na a paatiddogen ti panagturay na labes iti 2028.

Ti kinapudno na, sul-ot latta ni Marcos iti pukkaw iti umili tapno pasungbaten ni Duterte kadagiti krimen na, kas iti sul-ot latta isuna kadagiti pukkaw para iti hustisya iti amin a pananglabsing iti karbengan-tao idi panawen iti diktador a panagturay ni ama na. Dagiti pasista a patakaran iti rehimen Duterte ket isu met ita ti ipatpatungpal ni Marcos Jr tapno nasaknap a lappedan ti umili a lumablaban.

Ponpondoan ita dagiti Duterte ti maysa a sistematiko ken nasaknap a kampanya a disimpormasyon ken peke a panagpadamag iti social media. Tapno maala ti simpatya iti publiko, parparuaren ita ti kampo a Duterte a “nakakakaasi” ken “biktima” iti pampulitika a pananglipit iti sigud a pasista a tirano, ken ti panangtiliw kenkuana ket pananglabsing iti linteg ken soberanya iti pagilian. Ar-aramaten dagitoy saan a kas argumento iti ICC, nu di ket tapno rubruban ti emosyon dagiti maka-Duterte, ken makapagparnuay kadagiti rali.

Gabgaburan da ti manupulo a rurog dagiti biktima iti pammapatay idi panawen iti brutal a panagturay ni Duterte. Target iti panangiridis-ridis ken pammutbuteng dagiti biktima ken pamilya da. Ilemlemmeng da ti kinapudno nga inusar ni Duterte ti bileg na iti linged iti “gera iti droga” tapno kontrolen ti suplay ti droga ken agbalin a kabibilgan nga apo’t droga iti amin a drug lord iti Pilipinas. Punpunasen da iti lagip dagiti umili nu kasano da ad-adda a nagrigat ken nagsagaba kadagiti anti-mangmangged, anti-mannalon, anti-marigrigat ken anti-nasyunal a patakaran ni Duterte, kagiddan iti nakakarkaro a korapsyon ken pananggamrud iti kinabaknang iti pamilya ken alipures na.

Atiddog pay iti laban iti ICC ken dagiti biktima ken umili a Pilipino. Dumalan pay daytoy iti adu a pilko ken tayyek. Rumbeng nga allukoyen ken tulungan nga agsarita ken tumestigo dagiti rinib-ribu pay a biktima ken testigo tapno papigsaen ti kaso iti ICC ken ti panawagan a madusa ni Duterte ken amin a kakumplot na kadagiti krimen.

Iti panangusig kenni Duterte iti ICC, nailukat iti barbaro a tay-ak iti pannakidangadang tapno pasungbaten dagiti nauulpit a diktador, tirano ken dagiti nabalkot-iti-landok a pasista, a dandani imposible a madusa iti sidong iti reaksyunaryo a korte iti Pilipinas. Nasken a suportaran ken papigsaen ti panawagan a pumauneg manen ti Pilipinas iti ICC ken iduron ti rehimen Marcos nga aramiden daytoy. Iti sango iti saan a patas a panagraira ken panangipatungpal iti linteg iti aso-aso nga estado iti Pilipinas, ti pannakaipauneg manen iti ICC ket pabor kadagiti rinib-ribu a biktima iti pasista a pananglapped ken terorismo iti estado nga agtartarigagay iti hustisya. Kagiddan na, rumbeng a pagsaganaan ti panagdarum iti ICC maibusor laban kenni Marcos, kadagiti kumander iti dibisyon ken batalyon, a daulo iti krimen laban iti sangkataoan ken krimen iti gubat.

Kagiddan na daytoy, rumbeng nga agtultuloy nga isayangkat ti nasaknap a propaganda ken edukasyon tapno maiduron ti panangpasungbat kenni Duterte ken panagsingir kenni Marcos iti panagtultuloy na iti pasista a pananglapped, panangparigat iti umili, korapsyon ken panagbalin a paspasurot iti ganggannaet nga imperyalista nga interes. “Marcos-Duterte, awan nagdumaan na” kadagiti nakaam-ames a krimen iti ekstrahudisyal a pammapatay, panagdukot, tortyur, panangibalud ken panangisampa iti parparbo a kaso ken panangimula iti ebidensya, laban kadagiti umili a makidangdangadang. Rumbeng nga agtultuloy a papigsaen ti pannakilaban kenni Marcos ken kadagiti upisyal militar ken pulis nga agitultultoy iti pasista a panagturay ken panagranggas kadagiti umili.

“Marcos-Duterte, awan nagdumaan na” iti pamarparigat iti umili a Pilipino. Awan nagbaliwan na iti agtultuloy a panagngato iti presyo iti gagatangen, nasaknap nga kinaawan panggedan, ken panagsuek iti kabiagan iti mayorya nga umili. Awan nagbaliwan na kadagiti pamarparigat a patakaran a pannakailansa iti nababa a tangdan dagiti mangmangged, nakaad-adu nga importasyon iti bagas ken dadduma pay nga agrikultural a produkto kasukat iti pannakadadael iti lokal a produksyon, ken panangpabor kadagiti ganggannaet a kapitalista a manggamgamrud iti kinabaknang iti pagilian ken mangdaddadael iti aglawlaw. Awan nagbaliwan na iti awan ressat a panagutang, korapsyon kadagiti kontrata iti gobyerno, ismagling, ken sosyohan dagiti kartel ken dagiti sindikato a kriminal.

“Marcos-Duterte, awan nagdumaan na” iti disnudo a mairaman iti risiris iti US ken China. Iti sidong ni Marcos, lallalo nga agari-ari dagiti pwersa militar iti US iti Pilipinas, ken lalo a dumakdakkel ti risgo a mairamraman ti pagilian iti imperyalista a gera, kagiddan iti dumakdakkel a papel iti US iti panangisuplay iti armas ken ramit iti AFP nga ar-armaten iti gera iti pananglapped laban iti umili.

Iti kamaudianan na, ti pudno a panagbalbaliw a tarigagay iti umili ket magun-od laeng babaen iti rebolusyonaryo a panagbalbaliw iti Pilipinas. Agtultuloy a tumaktakder ken lumablaban ti umili a Pilipino a parparigaten iti imperyalismo, pyudalismo ken burukrata kapitalismo. Rumbeng nga rippuogen ti rinuker a reaksyunaryo a neokolonyal nga estado iti dadakkel a burgesya komprador, dadakkel nga apo’t daga ken burukrata kapitalista.

Tapno magun-od ti tarigagay nga hustisya ken pudno a wayawaya, rumbeng nga amin-a-kabaelan a suportaran, itandudo ken pairtingen ti umili a Pilipino ti armado a pannakidangadang iti New People’s Army. Babaen laeng iti pannangiballigi iti gubat iti umili masierto a maikkan hustisya iti amin a biktima iti panangidadanes ken pananggundaway ken magun-od ti tartarigagayen a nailian a wayawaya, demokrasya ken sosyalista a masakbayan.