Gidakop ug tinuyong gipatay sa mga sundalo sa 62nd Infantry Battalion si Tony Pahayahay (Ka Pidol), usa ka Pulang manggugubat sa BHB-Central Negros niadtong Mayo 1 sa Barangay Humay-humay, Guihulngan City, Negros Oriental. Nasamdan si Pahayahay sa panagbangi ug nadakpan usa ka kilometro gikan sa nahitaboan sa engkwentro. Samtang usa pa ka samaron nga Pulang manggugubat ang gidakop apan wala pa gilutaw sa publiko sa mga sundalo.

Sa laing bahin sa nasud, padayon ang mga paglapas sa tawhanong katungod.

Pag-aresto. Giaresto sa mga pulis ang 10 ka residente ug tribong Molbog sa Sityo Marihangin sa Barangay Bugsuk, Balabac, Palawan niadtong Mayo 15. Gibabagan sa mga minorya ang San Miguel Corporation sa pag-angkon sa ilang yuta aron tukuran og resort nga molangkub og kapin sa 5,500 ektarya.

Militarisasyon. Sukad Marso, pipila ka mga barangay gikan sa lungsod sa Baleno ug Masbate City ang nakapailalum sa RCSP. Sumala sa PKM-Masbate, ginakontrol sa militar ang matag lihok sa mga residente ug gipugngan ang gidaghanon sa pagkaon nga ilang konsumohon. Dayag usab nga gikawat sa militar ang ilang mga gialimahang mananap.

Red-tagging. Duha ka lider-estudyante gikan sa UP Cebu ang miatras sa ilang kandidatura alang sa eleksyon sa mga estudyante sa kampus niadtong Mayo tungod sa grabeng Red-tagging. Giingon nila nga grabe ang kahadlok nga ilang nasinati ug sa ilang mga pamilya human gipakita sa social media ang ilang mga litrato ug pangalan nga ginalambigit sa armadong rebolusyonaryong kalihukan.