Nadakop ngan tuyo nga ginpatay han mga sundalo han 62nd IB hi Tony Pahayahay (Ka Pidol), Pula nga mangaraway han BHB-Central Negros hadton Mayo 1 ha Barangay Humay-humay, Guihulngan City, Negros Oriental. Nasamaran ha engkwentro hi Pahayahay ngan nadakop usa kakilometro an kahirayuon tikang ha pinanhitabuan han agway. Samtang, usa pa nga samaran nga Pula nga mangaraway an gindakop ngan diri pa iginpapalutaw han mga sundalo.

Sa iba nga parte han nasud, dirudiretso an mga pagtalapas ha tawhanon-nga-katungod.

Pag-aresto. Gin-aresto han mga pulis an 10 nga residente ngan nasyunal minoriya nga Molbog ha Sityo Marihangin ha Barangay Bugsuk, Balabac, Palawan hadton Mayo 15. Gintitipahan han mga minoriya an San Miguel Corporation ha pag-amkon ha ira tuna agud tindugan han resort nga naglulupgop ha masobra 5,500 kaektarya.

Militarisasyon. Tikang pa Marso nakapailarum an pira nga mga barangay tikang ha bungto han Baleno ngan Masbate City ha RCSP. Sigon ha PKM-Masbate, ginkokontrol han mga militar an kada gios han mga residente ngan gintatalaanan han kadamuon han pagkaon nga poyde la igkonsumo. Butaray liwat nga ginkakawat han militar an ira mga inataman nga hayop.

Red-tagging. Duha nga lider-estudyante tikang ha UP Cebu an inatras ha kandidatura para ha eleksyon han mga estudyante ha kampus hadin Mayo tungod ha grabe nga Red-tagging. Sering nira, grabe nga kahadlok an gin-antos han duha nga kandidato ngan han ira mga pamilya kahuman gumawas ha social media an ira piktyur ngan ngaran nga igindadabi ha armado nga rebolusyunaryo nga kagiusan.