Kinemmeg ken ingagara a pinapatay dagiti soldado ti 62nd IB ni Tony Pahayahay (Ka Pidol), Nalabbaga a mannakigubat ti NPA-Central Negros idi Mayo 1 idiay Barangay Humay-humay, Guihulngan City, Negros Oriental. Ni Pahayahay ket nasugatan iti engkwentro ken nakemmeg iti kaadayo a maysa a kilometro manipud iti nakapasamakan ti labanan. Kabayatanna, maysa pay a nasugatan a Nalabbaga a mannakigubat ti tiniliw ken saan pay nga inparparang dagiti soldado.

Iti dadduma a paset ti pagilyan, tuloy-tuloy dagiti panaglabsing iti karbengan-tao.

Panag-aresto. Inaresto dagiti pulis ti 10 residente ken katutubo a Molbog iti Sityo Marihangin iti Barangay Bugsuk, Balabac, Palawan idi Mayo 15. Supsupyaten dagiti katutubo ti San Miguel Corporation iti panangtagikua daytoy iti daga da tapno pangitakderan ti resort a sumaksaklaw iti nasurok 5,500 ektarya.

Militarisasyon. Manipud pay Marso ket nakaipasidongen iti RCSP ti sumagmamano a barangay manipud iti Baleno ken Masbate City. Segun iti PKM-Masbate, konkontrolen dagiti militar ti tunggal garaw dagiti residente ken makedkedngan ti kaadu ti taraon a mabalin da laeng nga ikonsumo. Sipaparang met a taktakawen dagiti militar dagiti taraken da nga ayup.

Red-tagging. Dua a lider-estudyante manipud iti UP-Cebu ti nagsanud iti kandidatura para iti eleksyon ti estudyante iti kampus daytoy Mayo gapu iti nakaro a Red-tagging. Kunada, nakaro a buteng ti napadasan ti dua a kandidato ken dagiti pamilya da kalpasan a rimwar iti social media ti ladawan ken nagan da a maisilsilpo iti armado a rebolusyonaryo a tignay.