Walag-too nga pagsaway ang misugat sa “bag-ong” planong pangkalinaw sa rehimeng Marcos nga gipubliko sa National Security Council niadtong katapusang semana sa Abril. Pormal nga giaprubahan sa rehimen ang National Plan for Unity, Peace and Development (NAP-UPD) pinaagi sa pagpagula sa Memorandum Circular No. 83 niadtong Mayo 2.

Dungan sa pagpakaylap sa NAP-UPD, gipanghinambog sa rehimen ug sa NTF-Elcac nga hingpit na nilang mapildi ang armadong kalihukan kung mabungkag na ang “katapusang nakabarog nga nataran” nga giingong anaa sa Camarines Sur sa katapusang tuig.

Sumala sa Partido Komunista ng Pilipinas (PKP), ginailad lamang ni Marcos ug sa iyang mga upisyal ang ilang kaugalingon sa pagsulting mapukan na ang rebolusyonaryong kalihukan. Gipanghimakak mismo kini sa padayon nga pagdeploy sa militar sa daghang mga batalyong pangkombat batok sa mga yunit sa Bagong Hukbong Bayan sa tibuok nasud.

Pangutana sa PKP, unsaon pag-angkon sa kalinaw kung nagapadayon ang tiranya ug pagpang-abuso ngadto sa katawhan? Padayon ang paghari-hari sa mga sundalo sa gatusan ka mga komunidad sa mga mag-uuma ug lumad pinaagi sa “community support.” Sa mga komunidad nga giingong “insurgency-free,” gipasipad-an ang mga katungod sa mga tawo ug kaylap ang pagpangabuso.

Walay kalinaw hangtud nakabilanggo ang mga konsultant sa negosasyon nga moatubang sa pagresolba sa mga ugat sa armadong panagbangi, matud sa PKP. Laraw lamang sa rehimen nga pasurenderon ang mga Pulang manggugubat, luiban ang ilang rebolusyonaryong pakigbisog, ug biyaan nga walay idepensa ang katawhang Pilipino batok sa brutal ug bangis nga makinarya sa estado.

Hangtud walay pag-ila sa mga ugat sa armadong panagbangi, walay kalinaw nga mahitabo, ang PKP nagkanayon.

Gimakmak usab sa mga progresibong organisasyon ang NAP-UPD, nga ilang gitawag og “recycled.”

Sumala sa Bagong Alyansang Makabayan ug National Union of People’s Lawyers, gipadayon sa NAP-UPD ang daan nang malupigong pamaagi aron “makab-ot ang kalinaw.” Klaro kini sa pagtudlo sa NTF-Elcac isip nag-unang tigpatuman sa programa, subay sa “whole-of-nation” nga pamaagi. Matud nila, gihatagan lamang sa NAP-UPD og bag-ong nawong ang daan nang nasulayan ug napakyas nga estratehiya batok sa insurhensiya.

Nasayud ang mga grupo nga ang tinuod nga ginapuntirya sa NAP-UPD mao ang dayag nga mga organisasyong masa sa mga mamumuo, mag-uuma, ug uban pang dinaugdaug nga katawhan aron pahilumon sila sa ilang pagbatok sa reaksyunaryong gubyerno. Klaro usab dinhi ang planong labaw pang pagrabehon ang pulitikanhong pagpanumpo sa mga demokratikong sektor, gikan sa paghikaw sa demokratikong espasyo sa mga eskwelahan, lugar sa trabaho, ug bisan sa parlamento. Tataw usab ang tuyo nga gamiton ang magun-ubong mga balaod sama sa Anti-Terrorism Law ug Anti-Terrorist Financing Law aron “sirad-an” kuno ang “gripo” sa pinansya ug suporta sa armadong rebolusyon. Ang ingon niini nga malisyosong pag-uban sa mga sibilyan nagsilbing pasakalye aron sila pig-oton, iligal nga arestuhon ug ibalhog sa prisohan, pugsanong walaon, ug patyon.