Pagpanikas ang tatak sa eleksyon ilalum sa reaksyunaryong estado sa Pilipinas. Subli kining gipakita sa milabayng eleksyon kung asa kaylap, sistematiko ug dayag ang manipulasyon sa resulta sa botohan aron paburan ang nagharing papet nga rehimeng Marcos.

Atubangan sa kaylap nga anomalya ug kapalpak sa sistema sa pag-ihap sa boto sa Commission on Elections ug Miru Systems, dili katoohan sa mayorya sa katawhan nga ang resulta sa eleksyon misalamin sa tinuod nga boto sa katawhan. Sukad gisugdan ang dekompyuter nga pag-ihap sa boto sa Pilipinas, nadala sa walay katugbang nga ang-ang ang pagpanglimbong, malukpanong “dugang-kibhang” nga walay nakamatikod ug nakahibalo, gawas sa nagharing pundok ug pribadong langyawng kumpanyang mihimo sa sistemang wala giabli o gipadukiduki sa publiko.

Kaylap usab ang uban pang porma sa pagpanikas sa eleksyon sama sa pagpamalit og boto, paggamit sa pondong publiko (ilabina para ipang-ayuda sa gubyerno), kabangis ug pagpanghasi, ug Red-tagging.

Napabilin sa rehimeng Marcos ang mayoryang kontrol sa Senado ug kongreso. Pinaagi sa kontrol sa Kongreso, sigurado nga labaw pang iduso ni Marcos ang badyet, mga balaod ug programa nga nagsubay sa dikta sa langyawng mga bangko ug kumpanya, nga pabug-at ug paantus sa katawhan. Siguradong gamiton niini ang dominasyon sa Kongreso aron panalipdan ang interes sa mga Marcos.

Subsub ang gihimong interbensyon sa imperyalismong US sa eleksyon sa Pilipinas. Nabalaka kini pag-ayo sa nagkalalum nga krisis sa pulitika sa nagharing sistema, atubangan sa nagkagrabeng panagbangi sa paksyong Marcos ug Duterte. Sa partikular, atubangan sa nagkagrabeng krisis sa panginabuhian ug nagkalalum nga kasuko sa katawhan, nabalaka kini sa pagkahimulag sa papet niining si Marcos, ug pagkusog sa paksyong Duterte, nga ginagamit sa karibal niining China aron magpalalum sa impluwensya sa Pilipinas.

Gigamit sa US ang gahum, impluwensya ug koneksyon sa mga ahente niini sa pulitika, negosyo, midya, simbahan ug uban pang sektor aron palutawon ang usa ka “ikatulong pwersa” nga gilangkuban sa mga partido ug pulitiko nga mahigalaon sa US nga kasamtangang nakahan-ay sa koalisyon sa Liberal-Akbayan-Pink (LAP). Gihimo ang mga aregluhan sa pulitika aron sigurohong manguna ang mga kandidato niini sa Senado ug sistemang party-list, aron ipambato ug iatbang sa paksyong Duterte sa eleksyong 2028.

Giduso niini si Marcos nga dalhon ang mga kandidato sa LAP sa pagkasenador nga sila Bam Aquino ug Francis Pangilinan. Giangkon mismo sa tigpamaba sa partido ni Marcos nga subsub nilang gidala ang kandidatura sa duha. Dungan niini, nakig-areglo ang iladong personahe sa LAP nga si Leni Robredo sa Iglesia ni Cristo aron dalhon si Aquino, bugti sa iyang pag-endorso kang Rodante Marcoleta, iladong tighasmag ni Duterte, ilabina kontra ABS-CBN niadtong 2020. Daw “nasorpresa” ang tanan nga nakuha sa duha ang ikaduha ug ikalimang pwesto (gikan sa ranggong 13 paubos sa mga sarbey). Nagkasalapid ang dila sa paksyong Marcos ug LAP, ug mga tigsuporta niini sa akademya, masmidya ug simbahan, sa pagpasabot sa maong “sorpresa,” sa pagsulay nga bubuan sa bugnaw nga tubig ang kalihukang kontra sa pagpanglimbong ug hugaw nga pulitika.

Sama sa miaging eleksyon, giduso sa imperyalismong US ang subsub nga kampanya sa rehimeng Marcos batok sa mga makabayan ug progresibong grupo nga midagan sa senado ug party-list. Gigamit niini ang NTF-Elcac, militar ug pulis ug tibuok rekurso sa estado sa malukpanong Red-tagging, pagpanghadlok, pagpasaka og hinimu-himong kaso, pag-aresto ug pagpatay. Aron hatagag pangatarungan ang pulitikanhong pagpanumpo, gigamit ni Marcos ang pasistang pangatarungan nga ang maong mga grupo nagahimo og “insurhensya sa takuban sa eleksyon,” sa pagsulay nga sirad-an ang tanang natad alang sa demokratikong pagpadayag.

Sama sa mga miaging tuig, gitarget sila sa sistematikong pagkibhang sa boto sa mga progresibong party-list gamit ang dekompyuter nga sistema sa pag-ihap. Ginasuportahan sa US ug papet nga rehimeng Marcos ang mga maki-US nga grupong repormista sama sa Akbayan nga malinglahon nilang ginahulagway nga “Kaliwa” aron isimang ang katawhan sa dalan sa tinuog nga makabayan ug demokratikong kausaban. Tumong niini nga pahilumon ang tanang motingog batok sa nagkagrabeng interbensyong militar sa US sa Pilipinas ug paggamit sa nasud isip dakung base militar aron mag-istasyon og liboan ka tropang Amerikano ug maghan-ok og mga armas sigon sa pagpangandam niini og gubat batok sa China.

Bisan pa man, nahimo sa maong mga grupo nga makalunsad og malukpanong kampanya sa tibuok nasud. Tin-aw nilang gibitbit ang programa para iasdang ang nasudnon ug demokratikong pangandoy sa katawhan, ug ang mga panawagan alang sa makabuhi nga suhulan ug sweldo, trabaho, ubos nga presyo sa pagkaon ug lana, ug uban pang hinanaling panawagan ug panginahanglan sa mga mamumuo, mag-uuma ug uban pang kabus ug nilupigang sektor sa katilingbang Pilipino. Sa pagsalmot nila sa eleksyon, ilang nahagit, nabutyag ug nabatikos ang paghari sa mga burukrata-kapitalista, burgesya-kumprador ug agalong yutaan.

Subling gipakita sa miaging eleksyon sa nasud nga walay tinuod nga demokrasya sa Pilipinas. Gisul-uban lamang ang reaksyunaryong gubyerno sa bisti sa demokratikong lumbaay sa pulitika, nga ang makadula kadto lamang mga partido ug kandidatong adunay dakung kwarta nga pangpalit sa gahum.

Gitudlo sa kasaysayan nga kinahanglan ang rebolusyonaryong pakigbisog aron makab-ot ang tinuod nga kausaban nga gipangandoy sa katawhang Pilipino. Laraw sa rebolusyon nga sakmiton ang pulitikanhong gahum gikan sa mga nagharing hut-ong aron matukod ang tinuod nga demokratikong gubyerno nga morepresenta sa interes sa katawhan. Kinahanglang gunitan sa mga dinaugdaug nga hut-ong ang estado poder aron ipatuman ang mga kausaban sa ekonomiya ug katilingbanong sistema pabor sa katawhan.

Mahimo lamang ang maong kausaban pinaagi sa rebolusyonaryong armadong pakigbisog, isip nag-unang porma sa pakigbisog, lakip ang uban pang porma sa pagsukol. Pinaagi sa pagpaasdang sa Bagong Hukbong Bayan sa malungtarong gubat sa katawhan aron hinay-hinay nga pahuyangon ang kusog sa kaaway, inang-ang nga ginatukod sa BHB ug masa ang bag-ong demokratikong gubyerno ug bag-ong sistema sa katilingban, kung asa ang masa ang nakapahimulos sa bahandi nga ilang ginamugna.

Nanglimbasog ang katawhang Pilipino ug ilang mga rebolusyonaryong pwersa sa dalan sa armadong pakigbisog nga adunay determinasyong moabante ug kab-oton ang kadaugan sa umalabot. Walay makapugong sa pagpatuman nila sa makasaysayong tahas nga kab-oton ang nasudnong kahimtang ug tinuod nga demokrasya.