Human sa eleksyon, gipadayag sa Koalisyong Makabayan ang ilang pagpasalamat sa tanan nga mga nagsuporta, mikampanya, ug miboto sa 11 nilang kandidato sa pagka-senador ug upat ka party-list. Gisiguro sa koalisyon nga magpadayon sila sa pakigbisog alang sa demokratikong katungod sa mga Pilipino bisan humana ang kampanya ug eleksyon.

Nakadawat ang mga kandidato sa pagka-senador sa Makabayan ug tunga sa milyon hangtud 4.64 milyong boto. Ang upat ka party-list sa Makabayan nga ACT Teachers, Kabataan, Gabriela Women’s Party (GWP), ug Bayan Muna nakakuha ug kinatibuk-ang 1.08 milyong boto. Tig-usang pwesto ang nakuha sa Kabataan ug ACT Teachers samtang wala makadaug ang GWP ug Bayan Muna.

Sumala sa koalisyon, ang boto ug suporta nga ilang nadawat dili lamang numero nga magpabilin sa balota, kundili usa ka timaan sa pagbarog batok sa dunot nga sistema nga dugay nang nagpaantus sa nasud. Simbolo kuno kini sa kadaghan sa mga mamumuong Pilipino nga nakigbisog alang sa mas taas nga suhulan ug disenteng trabaho, mga mag-uuma nga nagbarog alang sa ilang katungod sa yuta, mga kabatan-onan nga nanangdanoy og makatarunganon ug gawasnong kaugmaon, ug uban pang mga sektor nga nakigbisog alang sa demokrasya.

Nakalunsad ang Makabayan og usa ka nasudnong kampanya ug nakatigum og milyon-milyong boto bisan pa sa dayag nga pagpanglimbong sa eleksyon 2025 gamit ang automated nga mga makina, padayon ug koordinadong mga atake sa pwersa sa estado, walay hunong nga Red-tagging ug pagpangdaugdaug, ug kampanya sa disimpormasyon.

Mibarog ang koalisyon batok niini. Nakig-uban sila sa mga demonstrasyon ug piket sa Kontra Daya ug Bagong Alyansang Makabayan sa lain-laing bahin sa nasud.

Niadtong Mayo 13, nagmartsa ang mga raliyista padulong sa Manila Hotel sa Manila diin naglunsad ang Comelec og nasudnong pag-ihap sa boto. Sa susamang adlaw, nagprotesta usab ang mga grupo ug partido sa Iloilo City ug Cavite City. Niadtong Mayo 14, nagprotesta pag-usab ang GWP sa Manila Hotel ug aduna usay demonstrasyon sa Quezon City, Trece Martires City sa Cavite, Batangas, Laguna, Aklan, ug Cebu. Nagpadayon ang susamang mga protesta sa mga sumunod nga adlaw.

Usa ka dakung rali usab ang gihimo sa mga grupo niadtong Mayo 19 sa Manila Hotel kauban ang proklamasyon sa mga mananaog sa eleksyon sa party-list.