Kalpasan ti panagbobotos, inpeksa ti Koalisyong Makabayan ti panagyaman iti amin a tagasuporta, kampanyador ken nagbotos iti 11 a kandidato daytoy iti kinasenador ken uppat a party-list. Sinigurado ti koalisyon nga agtultuloy da iti dangadang para kadagiti demokratiko a karbengan ti umili a Pilipino uray nalpasen ti kampanya ken panagbobotos.

Nakaawat ti kagudwa a milyon agingga 4.64 milyon a botos dagiti kandidato iti kinasenador ti Makabayan. Ti uppat a party-list ti Makabayan nga ACT Teachers, Kabataan, Gabriela Women’s Party (GWP) ken Bayan Muna ket nakaala ti kabuklan nga 1.08 milyon a botos. Saggaysa a pwesto ti naala ti Kabataan ken ACT Teachers bayat a napaay ti GWP ken Bayan Muna a mangabak.

Segun iti koalisyon, ti botos ken suporta a naawat da ket saan laeng a numero nga agtalinaed iti balota, nu di ket pammaneknek ti takder laban iti bulok a sistema a nabayagen a mangrirriribuk iti pagilyan. Segun kadakuada, daytoy ket simbolo ti bilang ti mangmangged a Pilipino a lumablaban para iti nayon a sweldo ken disente a trabaho, dagiti mannalon a tumaktakder para iti karbengan da iti daga, dagiti agtutubo nga agtartarigagay ti nainkalintegan ken nawaya a masakbayan, ken dadduma pay a makidangdangadang a demokratiko a sektor.

Naaramid ti Makabayan nga isayangkat ti maysa a nailyan a kampanya ken makakalap ti minilyon a botos iti laksid ti agdadata a panagsaur iti eleksyon 2025, babaen kadagiti automated a makina, sustenido ken koordinado nga atake dagiti pwersa ti estado, awan-sarday a Red-tagging ken panagikuspil ken kampanya ti disimpormasyon.

Timmakder ti koalisyon laban kadagitoy. Nakikaykaysa da kadagiti demonstrasyon ken piket ti Kontra Daya ken Bagong Alyansang Makabayan iti nadumaduma a paset ti pagilyan.

Idi Mayo 13, nagmartsa dagiti raliyista agturong ti Manila Hotel idiay Manila nu sadinno nga agisaysayangkat ti nailyan a panagbibilang ti Comelec. Didiay met laeng nga aldaw, nagisayangkat ti protesta dagiti grupo ken partido idiay Iloilo City ken Cavite City. Idi Mayo 14, balbaliw a nagprotesta ti GWP iti Manila Hotel ken naangay met ti demonstrasyon idiay Quezon City, Trece Martires City idiay Cavite, Batangas, Laguna, Aklan ken Cebu. Napasamak dagiti kapada a protesta kadagiti sumaruno nga aldaw.

Maysa met a dakkel a rali ti insayangkat dagiti grupo idi Mayo 19 iti Manila Hotel kagiddan ti proklamasyon dagiti nangabak iti eleksyon a party-list.