60-aldaw Lakbayan manipud Zamboanga. Nagisayangkat ti 60-aldaw a martsa dagiti mannalon, mangngalap ken katutubo nga umili manipud iti nadumaduma a prubinsya tapno supyaten ti panagkamkam ti daga ken kadanuman, a pagnaedan ken pagtataudan ti pagbiagan da. Nangrugi daytoy idi Marso 13 idiay Zamboanga Sibugay ken nagleppas idiay Metro Manila idi Mayo 10.

Pammadayaw kadagiti mangmangged iti salun-at. Nagisayangkat ti noise barrage ken piket dagiti unyon iti sidong ti Alliance of Health Workers idi Mayo 7 kas pananglagip iti Aldaw dagiti Mangmangged iti Salun-at. Dagiti tignay ket kangrunaan a naisayangkat idiay Metro Manila, bayat nga adda met dagiti taripnong idiay Baguio City iti panangiyuna ti Coalition of Health Workers’ Organizations in the Cordillera.

Labanan ti dredging. Sinupyat dagiti residente ti Barangay Silonay, Calapan City, Oriental Mindoro ti plano a dredging iti igid-baybay ditoy ken kaabay a Barangay Maidlang. Inyebkas da ti panagsupyat iti naiyaramid a pangpubliko a konsultasyon idi Mayo 9, iti suporta ti Mindoro Forum Network (MFN), Alyansa Laban sa Mina ken dagiti upisyal ti barangay. Simmangpet idi Abril 29 ti dadakkel a trak iti sungadan ti Silonay-Bucayao River para iti sand testing a nagdanagan dagiti residente.