Agsusumbangir a pananglais ti simmabat iti “baro” a plano iti kapya ti rehimen Marcos nga inwaragawag iti publiko ti National Security Council idi maudi a lawas ti Abril. Pormal a benindisyunan ti rehimen ti National Plan for Unity, Peace and Development (NAP-UPD) idi inruar daytoy ti Memorandum Circular No. 83 idi Mayo 2.

Kagiddan ti panagipasaknap ti NAP-UPD, ipaspasindayag ti rehimen ken ti NTF-Elcac a naan-anayen a maatiw ti armado a tignay nu maparmeken iti panaggibus ti tawen ti “maudi a nakatakder a larangan” a kunkuna daytoy nga adda idiay Camarines Sur. Segun iti Communist Party of the Philippines (CPP), loklokuen laeng ni Marcos ken dagiti upisyal na ti bagbagi da iti panangibaga a marebbeken ti rebolusyonaryo a tignay. Mapanpaneknekan ti kinaulbod daytoy iti agtultuloy a panagipakat ti militar ti pinullo a batalyon a pangkombat laban kadagiti yunit ti New People’s Army iti intero a pagilyan.

Pananglais ti CPP, kasano a maaddaan ti kapya iti tengnga ti tiranya ken panangdangran iti umili? Agtultuloy ti panagari-ari dagiti soldado iti ginasut a komunidad ti mannalon ken katutubo iti linged ti “community support.” Kadagitoy a komunidad, a maipaspasaw nga “insurgency-free,” pawpawilan da ti karbengan ti umili ken nasaknap dagiti panagabuso.

Awan ti kapya agingga a nakabalud dagiti konsultant iti negosasyon a sumango iti panangresolba kadagiti ramut ti armado a risiris, segun iti CPP. Gagem laeng ti rehimen a pasukuen dagiti Nalabbaga a mannakigubat, traydoren ti rebolusyonaryo a panaglaban da ken ibati nga awanan depensa ti umili a Pilipino laban iti brutal ken naranggas a makinarya ti estado.

Agingga nga awan ti panangbigbig kadagiti ramut ti armado a risiris, awan ti mapasamak a kapya, segun iti CPP.

Linais met dagiti progresibo nga organisasyon ti NAP-UPD, nga inawagan da a “recycled.”

Segun iti Bagong Alyansang Makabayan ken National Union of People’s Lawyers, pinagtalinaed ti NAP-UPD ti siguden a managikuspil a pamuspusan tapno “magun-od ti kapya.” Nalawag daytoy iti panangituding iti NTF-Elcac kas nangnangruna a para-ipatungpal ti programa, umannurot iti “whole-of-nation” approach. Kunada, inikkan laeng ti NAP-UPD ti baro a rupa ti siguden a nasubok ken napaay nga estratehiya iti kontra-insurhensya.

Ammo dagiti grupo a ti pudno a punpuntiryaen ti NAP-UPD ket dagiti naparang nga organisasyon ti masa dagiti mangmangged, mannalon ken dadduma pay a maidadanes nga umili tapno pagulimeken isuda iti panaglaban da iti reaksyunaryo a gubyerno. Nalawag ditoy ti plano nga ad-adda pay a pairtengen ti pangpulitika a panagikuspil kadagiti demokratiko a sektor, manipud iti panangipaidam kadakuada ti demokratiko nga espasyo kadagiti pagadalan, lugar-pagteggedan ken uray iti parlamento. Nalawag met ti turongen daytoy dagiti managikuspil a linteg kas ti Anti-Terrorism Law ken Anti-Terrorist Financing Law tapno kano “iserra” ti “gripo” ti pinansya ken suporta iti armado a rebolusyon. Ti kastoy a malisyoso a panangisilpo kadagiti sibilyan ket agserserbi a pakauna tapno lipiten, iligal nga arestaren ken itantan, pwersado a pukawen ken uray pay papatayen isuda.