Kahuman han eleksyon, iginpahayag han Koalisyong Makabayan an pagpasalamat ha ngatanan nga mga tagasuporta, kampanyador ngan bumotos ha 11 nga kandidato hini ha pagkasenador ngan upat nga party-list. Ginseguro han koalisyon nga magpapadayon hira ha pakigbisog para ha mga demokratiko nga katungod han katawhan Pilipino bisan kun human na an kampanya ngan piniliay.

Nakakarawat hin tunga kamilyon tubtub 4.64 kamilyon nga botos an mga kandidato ha pagkasenador han Makabayan. Nakakuha hin kabug-usan nga 1.08 kamilyon nga botos an upat nga party-list han Makabayan nga ACT Teachers, Kabataan, Gabriela Women’s Party (GWP) ngan Bayan Muna. Tag-usa nga pwesto an nakuha han Kabataan ngan ACT Teachers samtang pakyas an GWP ngan Bayan Muna nga magdaug.

Sigon ha koalisyon, an botos ngan suporta nga ira nakarawat diri la numero nga magpapabilin ha balota, kundi pagpamatuod han paninindugan kontra ha dunot nga sistema nga maiha na nga nakakaringgal ha nasud. Tigaman kuno ini han ihap han trabahador nga Pilipino nga naato para ha dugang nga suhol, disente nga trabaho, mga parag-uma nga naninindugan para ha ira katungod ha tuna, mga kabatan-unan nga naghihingyap hin makatadungan ngan talwas nga kabubuwason, ngan iba pa nga nakikigbisog nga demokratiko nga sektor.

Nahimo nga ilansar han Makabayan an usa nga nasyunal nga kampanya ngan makakuha han milyun-milyon nga botos ha luyo han butaray nga panlimbong ha eleksyon 2025 gamit an mga automated nga makina, dirudiretso ngan koordinado nga atake han mga pwersa han estado, waray hunong nga Red-tagging ngan panmuypoy, ngan kampanya han disimpormasyon.

Nanindugan an koalisyon kontra hini. Nakig-usa hira ha mga rali ngan piket han Kontra Daya ngan Bagong Alyansang Makabayan ha magkalain-lain nga parte han nasud.

Hadton Mayo 13, nagmartsa an mga raliyista tipakadto ha Manila Hotel ha Manila kun diin naglalansar han nasyunal nga pag-ihap an Comelec. Hito liwat nga adlaw, naglansar hin protesta an mga grupo ngan partido ha Iloilo City ngan Cavite City. Hadton Mayo 14, utro nga nagprotesta an GWP ha Manila Hotel ngan nagkamayda liwat han demonstrasyon ha Quezon City, Trece Martires ha Cavite, Batangas, Laguna, Aklan, ngan Cebu. Nagkamayda hin kapareho pa nga mga protesta ha mga sumunod nga adlaw.

Usa nga dako nga rali liwat an iginlansar han mga grupo hadton Mayo 19 ha Manila Hotel kadungan han proklamasyon han mga nagdaug ha eleksyon nga party-list.