Paluyu-luyo nga pagsukna an tumapo ha “bag-o” nga plano pankamurayawan han rehimen Marcos nga iginsapbliko han National Security Council hadton urhi nga semana han Abril. Pormal nga gin-aprubaran han rehimen an National Plan for Unity, Peace and Development (NAP-UPD) han ipagawas hini an Memorandum Circular No. 83 hadton Mayo 2.

Kadungan ha pagpapasamwak han NAP-UPD, iginpaparayaw han rehimen ngan han NTF-Elcac nga hul-os na nga mapeperdi an armado nga kagiusan kun nabungkag na an “urhi nga natindog nga prente” nga ginsesering hini nga aada ha Camarines Sur ha katapusan han tuig.

Sigon ha Partido Komunista ng Pilipinas (PKP), gin-uuwat la ni Marcos ngan han iya mga upisyal an ira mga kalugaringon ha pagsering nga mapeperdi na an rebolusyunaryo nga kagiusan. Ginpapanhimuwa ini han padayon nga pagdeploy han militar han narunapulo nga mga pankombat nga batalyon kontra ha mga yunit han Bagong Hukbong Bayan ha bug-os nga nasud.

Pagtamay han PKP, tiunan-o magkakamayda hin kamurayawan ha butnga han tiraniya ngan pangatake ha katawhan? Nagpapadayon an paghahadi-hadian han mga sundalo ha gatus-gatos nga komunidad han mga parag-uma ngan nasyunal nga minoriya ha tahub han “community support.” Hini nga mga komunidad, nga iginhihinambog nga “insurgency-free,” ginpupuypoy an katungod han katawhan ngan samwak an mga pangabuso.

Waray kamurayawan tubtub nga nakapriso an mga konsultant ha negosasyon nga maatubang ha pagresolba ha mga gamot han armado nga sumpakiay, sigon ha PKP. Hingyap la han rehimen nga pasurenderon an mga Pula nga mangaraway, igtraydor an ira rebolusyunaryo nga pag-ato ngan bayaan nga waray depensa an katawhan Pilipino kontra ha brutal ngan madarahug nga makinarya han estado.

Tubtub nga waray pagkilala ha mga gamot han armado nga sumpakiay, waray mahitatabo nga kamurayawan, sigon ha PKP.

Gintamay liwat han mga progresibo nga organisasyon an NAP-UPD, nga gintawag nira nga “recycled.”

Sigon ha Bagong Alyansang Makabayan ngan National Union of People’s Lawyers, ginpapabilin han NAP-UPD an hadto na nga mapanmuypoy nga mga pamaagi agud “makab-ot an kamurayawan.” Klaro ini ha pagtalaan ha NTF-Elcac komo nangunguna nga tagapagpatuman han programa, subay ha “whole-of-nation” approach. Sering nira, gintagan la han NAP-UPD hin bag-o nga nawong an hadto na nga napamatud-an ngan napakyas nga kontra-insurhensiya nga estratehiya.

Maaram an mga grupo nga an tinuod nga gintatarget han NAP-UPD amo an dayag nga mga organisasyon masa han mga trabahador, parag-uma ngan iba pa nga tinalumpigos nga katawhan agud pamingawon hira ha ira pag-ato ha reaksyunaryo nga gubyerno. Klaro dinhi an plano nga pabuyluhon pa an pampulitika nga panmuypoy ha mga demokratiko nga sektor, tikang ha paghikaw ha ira han demokratiko nga espasyo ha mga eskoylahan, lugar-pagtrabaho ngan bisan ha parlamento. Klaro liwat na tendensiya hini nga gamiton an mapan-gipit nga mga balaud sugad han Anti-Terrorism Law ngan Anti-Terrorist Financing Law agud “sadhan” kuno an “gripo” han pinansya ngan suporta ha armado nga rebolusyon. An sugad nga malisyoso nga pagsinumpay ha mga sibilyan nagseserbe nga pasakalye agud gipiton, iligal nga arestuhon ngan igpriso, piniritay nga igpawara, ngan bisan patayon hira.