Pagkatapos sang piniliay, ginpahayag sang Koalisyon Makabayan ang pagpasalamat sa tanan nga mga tagasuporta, kampanyador kag nagboto sa 11 ka kandidato sini sa pagka-senador kag apat ka party-list. Ginpaseguro sang koalisyon nga magapadayon sila sa paghimakas para sa mga demokratikong kinamatarung sang pumuluyong Pilipino bisan tapos na ang kampanya kag piniliay.

Nakabaton sang tunga sa milyon tubtob 4.64 milyon nga boto ang mga kandidato sa pagkasenador sang Makabayan. Ang apat ka party-list sang Makabayan nga ACT Teachers, Kabataan, Gabriela Women’s Party (GWP) kag Bayan Muna nakakuha sang kabilogan nga 1.08 milyon nga boto. Tag-isa ka pwesto ang nakuha sang Kabataan kag ACT Teachers samtang napaslawan ang GWP kag Bayan Muna nga magdaog.

Suno sa koalisyon, ang boto kag suporta nga ila nabaton indi lang numero nga magapabilin sa balota, kundi pamatuod sang panindugan batuk sa garuk nga sistema nga madugay na nga nagatay-og sa pungsod. Simbolo kuno ini sang isip sang mamumugon nga Pilipino nga nagapakigbato para sa dugang nga sweldo kag desente nga trabaho, mga mangunguma nga nagapanindugan para sa ila kinamatarung sa duta, mga pamatan-on nga nagahandum sang buasdamlag nga makatarungan kag hilway, kag iban pa nga nagahimakas nga demokratikong sektor.

Natigayon nga ilunsar sang Makabayan ang isa ka pungsodnon nga kampanya kag makakalap sang minilyon nga boto sa pihak sang hayagan nga dinayaay sa eleksyon 2025 gamit ang mga automated nga makina, sustenido kag koordinado nga atake sang mga pwersa sang estado, wala-untat nga Red-tagging kag pagpang-ipit, kag kampanya sang disimpormasyon.

Nagpanindugan ang koalisyon batuk sa mga ini. Nakig-isa sila sa mga demonstrasyon kag piket sang Kontra Daya kag Bagong Alyansang Makabayan sa lain-lain nga bahin sang pungsod.

Sadtong Mayo 13, nagmartsa ang mga raliyista padulong sa Manila Hotel sa Manila kon diin nagalunsar sang pungsodnon nga isipay ang Comelec. Sa adlaw man nga ini, naglunsar sang protesta ang mga grupo kag partido sa Iloilo City kag Cavite City. Sadtong Mayo 14, liwat nagprotesta ang GWP sa Manila Hotel kag may yara man sang demonstrasyon sa Quezon City, Trece Martires City sa Cavite, Batangas, Laguna, Aklan, kag Cebu. May yara man kaangay pa nga mga protesta sa mga nagsunod nga adlaw.

Isa ka dako nga rali man ang ginlunsar sang mga grupo sadtong Mayo 19 sa Manila Hotel kadungan sang proklamasyon sang mga nagdaog sa eleksyon party-list.