Wala-tuo nga pagpang-insulto ang ginsug-alaw sa “bag-o” nga plano pangkalinong sang rehimen Marcos nga ginsapubliko sang National Security Council satong ulihi nga semana sang Abril. Pormal nga ginbasbasan sang rehimen ang National Plan for Unity, Peace and Development (NAP-UPD) sang ipaguwa sini ang Memorandum Circular No. 83 sadtong Mayo 2.

Kadungan sa pagpalapnag sang NAP-UPD, ginapadayaw sang rehimen kag sang NTF-Elcac nga lubos na nga malutos ang armadong kahublagan kon madugmok na ang “katapusan nga nagatindog nga larangan” nga ginasiling sini yara sa Camarines Sur sa katapusan sang tuig.

Suno sa Partido Komunista ng Pilipinas (PKP), gina-into lang ni Marcos kag sang iya mga upisyal ang ila mga kaugalingon sa pagsiling nga malutos na ang rebolusyonaryong kahublagan. Ginpanginwala ini sang padayon nga pagpakat sang militar sang puluan ka mga batalyon pang-kombat batuk sa mga yunit sang Bagong Hukbong Bayan sa bug-os nga pungsod.

Pag-insulto sang PKP, paano makaangkon sang kalinong sa tunga sang tiraniya kag pagpanghalit sa pumuluyo? Nagapadayon ang paghari-harian sang mga soldado sa ginatos ka komunidad sang mga mangunguma kag tumandok sa tabon sang “community support.” Sa mga komunidad nga ini, nga ginapadayaw nga “insurgency-free,” ginasumpo ang kinamatarung sang pumuluyo kag lapnagon ang mga pagpang-abuso.

Wala sang kalinong tubtob nakabilanggo ang mga konsultant sa negosasyon nga maga-atubang sa pagresolba sa mga ugat sang armado nga banggi-anay, suno sa PKP. Handum lang sang rehimen nga pasungkaon ang mga Pulang hangaway, traidoran ang ila rebolusyonaryo nga pakig-away kag bayaan nga wala sang depensa ang pumuluyong Pilipino batuk sa brutal kag mapintas nga makinarya sang estado.

Tubtob wala sang pagkilala sa mga ugat sang armado nga banggi-anay, wala sang mahitabo nga kalinong, suno sa PKP.

Gin-insultohan man sang mga progresibong organisasyon ang NAP-UPD, nga gintawag nila nga “recycled.”

Suno sa Bagong Alyansang Makabayan kag National Union of People’s Lawyers, ginpabilin sang NAP-UPD ang daan nga mapangsumpo nga pamaagi para “maagum ang kalinong.” Maathag ini sa pagtalana sang NTF-Elcac bilang nagapanguna nga tigpatuman sang programa, sandig sa “whole-of-nation” approach. Suno sa ila, ginhatagan lang sang NAP-UPD sang bag-o nga nawong ang daan na nga natilawan kag napaslawan nga estratehiya kontra-insurhensya.

Kahibalo ang mga grupo nga ang matuod nga ginapuntirya sang NAP-UPD amo ang hayag nga mga organisasyon masa sang mga mamumugon, mangunguma kag iban pa nga pumuluyo nga pigos para pahipuson sila sa ila pakig-away sa reaksyonaryong gobyerno. Maathag diri ang plano nga palargahon pa ang pangpulitika nga pagpangsumpo sa mga demokratikong sektor, halin sa pagdingot sa ila sang demokratikong espasyo sa mga eskwelahan, lugar-trabahuan kag bisan sa parlyamento. Maathag man ang katuyuan sini nga gamiton ang pang-ipit nga mga layi kasubong sang Anti-Terrorism Law kag Anti-Terrorist Financing Law para “siradhan” kuno ang “gripo” sang pinansya kag suporta sang armadong rebolusyon. Ang amo sini nga malisyoso nga pag-angot sa mga sibilyan nagaserbe nga pasakayle para ipiton, iligal nga arestuhon kag prisohon, pwersa nga dulaon, kag bisan patyon sila.