Sa atubang sang nagalala nga krisis sa ekonomiya kag lapnagon nga pagwasak sa pangabuhian sang masang anakbalhas, padayon nga nagatindog ang mga mamumugon kag imol nga taga-syudad. Nagaaway sila paagi sa paglunsar sang mga piket,welga, untat-byahe kag barikada sang pumuluyo.

Welga sa Kawasaki. Nagwelga ang 140 ka mamumugon sang Kawasaki Motors Phils. Corporation (KMPC) sa pagpanguna sang Kawasaki United Labor Union sadtong Mayo 21 tungod sa indi pag-idog sang negosasyon sa collective bargaining agreement (CBA) sa tunga sang pamunuan kag unyon. Ginpatindog ang piketlayn sang unyon sa atubang sang hedkwarters sang kumpaniya sa Muntinlupa City. Nagapanawagan sila sang makabuhi nga sweldo, makatarungan nga benepisyo kag pagkilala sang kinamatarung sang mga mamumugon.

Away sang mga drayber sa Lucena City. Halos duha ka bulan na nga nagawelga ang mga drayber kag mamumugon sang FOC Transportation Corporation sa terminal sini sa Barangay Comon, Infanta, Quezon. Ang mga bus nagabyahe sa rota nga Infanta-Lucena City. Ginpalupok ang welga tungod sa pagdingot sa makatarungan nga separation pay kag indi pag-atubang sang kumpaniya sa negosasyon. Imbes nga sabton ang reklamo sang mga mamumugon, ginpasakaan sang kaso nga grave coercion kag illegal strike ang mga mamumugon sang kumpaniya kag organisador sang pederasyon sang unyon.

₱1,200 makabuhi nga sweldo. Nagpiket ang mga mamumugon halin sa National Capital Region (NCR) sa pagpanguna sang Unity for Wage Increase Now sa Regional Tripartite Wages and Productivity Board-NCR kadungan sang pagpasaka sang petisyon para sa ₱1,200 makabuhi nga sweldo sadtong Mayo 22. Gintuon nila ang hublag kag pagsumite sa ginpatawag nga konsultasyon sa sweldo sang RTWPB NCR.

Sadtong Hunyo 2, nagpiket ang mga mamumugon sa atubang sang Kongreso agud igiit ang pagpasar sang hagna nga ₱200 dugang-sweldo para sa tanan nga mamumugon sa pungsodnon nga sakop. Duha ka adlaw pagkatapos sini, ginpasar sang Kongreso ang amo nga hagna sa ikatatlo nga pag-hearing. Siling nila, bisan tuman ka layo pa gihapon sang dugang nga ₱200 sa ₱1,200 nga makabuhi nga sweldo, dapat na ini gilayon nga maaprubahan kag pirmahan ni Ferdinand Marcos Jr.

NCAP kag jeepney phaseout, ibasura. Sadtong Hunyo 2, nagkaraban ang Stop NCAP Coalition sa mga mayor nga dalan sa Metro Manila kag nagtipon sa atubang sang opisina sang MMDA sa EDSA-Ortigas agud ipabasura ang No-Contact Apprehension Policy (NCAP). Suno sa koalisyon, ang NCAP iligal, kontra-imol, kag wala nag-agi sa husto nga proseso. Una na nga ginkwestyon sang mga eksperto sa layi kag grupo sa tawhanon nga kinamatarung ang patakaran, ilabi na angot sa basehan pang-konstitusyon kag mga proseso sini.

Nag-untat byahe kag nagprotesta ang mga tsuper kag opereytor sang dyip sa Panay kag Negros para ipabasura ang Public Transportation Modernization Program (PTMP) kag Local Public Transport Route Plan (LPTRP) sadtong Hunyo 5 kag Mayo 30. Kabahin ini sang semana sang protesta nga ginlunsar sang Piston halin Hunyo 2 tubtob Hunyo 6.

Barikada sa Mayhaligue, Tondo. Ginpaslaw sang paghugpong kag barikada sang mga residente sang Mayhaligue Street sa Barangay 262 kag 264 sa Zone 24, Tondo, Manila ang demolisyon nga ginlunsar sang mga pwersa sang estado sadtong Mayo 26. Apat ang iligal nga gin-aresto sang mga pulis sa komprontasyon. Masobra 400 ka pamilya ukon kapin 2,000 ka indibidwal ang mawad-an sang puluy-an sa plano nga demolisyon kag pagpang-angkon sang kumpaniya nga 2288 Ethan Realty Corporation. Temporaryo nga ginpa-untat sang isa ka korte sa Manila ang demolisyon sunod sang pag-apin sa petisyon para sa temporary restraining order (TRO) sadtong Mayo 27.

Demolisyon sa Davao City. Indi magnubo sa 400 ka pamilya ang napalayas sa ginpatigayon nga demolisyon sang 500 ka tawo nga pwersa nga ginalakipan sang 300 pulis, sa Upper Arroyo, Barangay Matina Crossing, Davao City sadtong Mayo 23. Naglab-ot sa 80 ka balay ang ginguba sa demolisyon kon diin apektado ang 60 ka tigulang kag indi magnubo sa 200 ka bata. Isa ka mando sang korte ang gingamit para patigayunon ang demolisyon apang para lang ini sa pito ka kabalayan sa amo nga distrito. Temporaryo nga napauntat ang demolisyon tungod sa TRO nga nakuha sang mga residente sadtong Mayo 24.