Sa una nga 24 ka oras sang madugo nga kampanya nga Operation Gideon’s Chariots sang US kag Israel, 144 gilayon ka Palestino ang napatay sa mga bomba kag pag-atake sang tropa sini sa Gaza. Sa sunod nga adlaw, asod-asod nga gin-atake sang mga pwersang Israel ang mga bakwitan kag nabilin nga mga ospital kag eskwelahan para tabugon ang mga Palestino padulong sa mga prisohan nga gin-andam para sa ila. Ginatos sa mga napatay mga bata.

Ang Operation Gideon’s Chariot, nga ginsugdan sadtong Mayo 18, ang pamatay nga halit sang Israel kag US sa subong 18 ka bulan na nga henosidyo kag 77 ka tuig nga brutal nga okupasyon sini sa mga teritoryo sang Palestine. Katuyuan sini nga direkta nga sakupon ang bug-os nga Gaza kag prisohon ang may 1.5 milyon ka Palestino sa “sentro sang ebakwasyon” sa bahin sang sur sang engklabo.

Halin Oktobre 2023, naglab-ot sa 63,000 ka Palestino ang direkta nga ginpatay kag 118,300 ang napilasan sang pagpangbomba kag pagpangsalakay sang Israel. Kapin katunga sang mga biktima mga bata kag kababaenhan. Ginabana-bana nga ginatos ka libo pa ang napatay tungod sa gutom, balatian kag kakulangan sang pasilidad medikal. Madamo man ang natabunan na lang sang nagkalarumpag nga mga bilding kag balay, nga wala makita ukon nakalkal tungod sa wala puas nga pagpangsalakay sang Israel.

Paggamit sa pagkaon kag ayuda bilang armas kag negosyo

Naglab-ot sa lebel-kalamidad ang pagkagutom sa Gaza ilabina halin Marso kon diin absoluto nga gindumilian sang Israel ang pagsulod sang tanan nga klase sang ayuda. Sadtong Mayo, ginhatag sini ang responsibilidad sang pagpanagtag sang pagkaon sa Gaza sa Humanitarian Foundation (GHF), isa ka pribado nga kumpaniya nga magkabulig nga gintukod sang US kag Israel para “lutoson” ang Hamas.

Hugot nga ginbatikos sang United Nations ang paggamit sang Israel sa GHF, nga siling taliw-as sa dapat pagka-nyutral, imparsyal kag independyente sang makatawo nga hilikuton. Ginkundenar sang UN kag sang madamo nga pungsod kag internasyunal nga institusyon, ang paggamit sang Israel kag US sang ayuda kag pagkaon bilang armas batuk sa mga sibilyan.

Magluwas sa GHF, ginpasulod man sang Israel ang iban pa nga pribado nga kumpaniya nga Amerikano para mag-akto nga “pwersang pangseguridad” sa mga sentro sang distribusyon sini. Lakip diri ang Safe Reach Solutions, UG Solutions kag S.R.S. Security Firm, nga tanan ginapanag-iyahan sang mga anay heneral sang US Army kag Central Intelligence Agency. Ang pagpili sa mga kumpaniya nga ini ginhimo sang pinakamataas nga opisyal sang Israel, kabulig ang US, nga wala nag-agi bisan sa ila matag-parlyamento kag kongreso.

Tayuyon nga pangkalibutanon nga protesta

Minilyon ka pumuluyo sa bug-os nga kalibutan ang naghiliusa nga nagprotesta batuk sa panibag-o nga bugso sang henosidyo sa Gaza. Panawagan nila ang gilayon kag permanente nga untat-lupok sa Gaza kag pag-untat sang brutal nga pagpang-atake kag pagpangbomba sang Zionistang Israel. Gintuon ang mga protesta sa pagdumdum sa ika-77 nga anibersaryo sang Nakba ukon Ang Kalamidad, ang una nga higayon sang mapintas nga ginpalayas sang mga Zionista ang mga Palestino gikan sa ila mga duta agud itukod ang estado sang Israel.

Ginatos ka mga hublag ang ginpatigayon sa mga syudad sa Middle East, Europe, Asia, Africa kag bisan sa sulod sang US. Madamo nga pamatan-on estudyante sa US ang nagpangahas nga maglunsar sang mga protesta kag diskusyon sa mga unibersidad sa tunga sang grabe nga pagpang-ipit sa ila.

Sa Pilipinas, nagpakig-isa ang Moro-Chiristian Peoples Alliance (MCPA) sa pangkalibutanon nga panawagan sang gilayon kag permanente nga untat-lupok sa Gaza.

Suno kay Amirah Lidasan, sekretaryo heneral sang MCPA, “sugod sang nauntat ang untat-lupok, ang Zionista nga Israel kag ang numero uno sini nga tigpondo wala sang ginpakita nga kaluoy sa mga utod nga Palestino.”

Nagapanawagan siya sa internasyunal nga komunidad nga padayon nga engganyuhon ang ila mga lider nga maghimo sang aksyon batuk sa wala-untat nga pagpang-atake sang Israel. “Ang paghilway sang isa kahilwayan sang tanan, ilabina subong sa atubang sang grabe nga paglapas sa tawhanon nga kinamatarung, indi kita dapat mag-untat tubtob indi mahilway ang Palestine,”siling niya.

Sadtong Mayo 23, nagpatigayon ang grupo sang porum kag martsa sa University of the Philippines-Diliman. Nagsanto ini sa ika-8 nga anibersaryo sang pagpatuman ni Rodrigo Duterte sang layi militar sa Mindanao kag pagdugmok sa Marawi City, ang bugtong nga syudad nga Islam sa pungsod, sadtong 2017.