Atubangan han nagtitikagrabe nga krisis ha ekonomiya ngan hiluagan nga pandestroso han pakabuhi han masa nga anakbalhas, padayon nga natindog an mga trabahador ngan kablas ha syudad. Nakikigbisog hira pinaagi han paglalansar hin mga piket, welga, ukoy-pasada ngan barikada han katawhan.

Welga ha Kawasaki. Nagwelga an 140 nga trabahador han Kawasaki Motors Phils. Corporation (KMPC) ha pangunguna han Kawasaki United Labor Union hadton Mayo 21 tungod ha diri pag-abante han negosasyon ha collective bargaining agreement (CBA) pinaagi han pamunuan ngan unyon. Nakatukod an piketlayn han unyon ha atubangan han hedkwarters han kompaniya ha Muntinlupa City. Nananawagan hira han makaburuhi nga suhol, makatadungan nga benepisyo ngan pagkilala ha katungod han mga trabahador.

Pakigbisog han mga drayber ha Lucena City. Haros duha kabulan na nga nakawelga an mga drayber ngan trabahador han FOC Transportation Corporation ha terminal hini ha Barangay Comon, Infanta, Quezon. An mga bus nabiyahe ha ruta nga Infanta-Lucena City. Gintikangan an welga tungod ha paghihikaw ha makatadungan nga separation pay ngan diri pag-atubang han kompaniya ha negosasyon. Imbes nga batunon an mga demanda han mga trabahador, ginsalawdan hin kaso nga grave coercion ngan illegal strike an mga trabahador han kompaniya ngan organisador han pederasyon han unyon.

₱1,200 nga makaburuhi nga suhol. Nagpiket an mga trabahador tikang ha National Capital Region (NCR) ha pangunguna han Unity for Wage Increase Now ha Regional Tripartite Wages and Productivity Board-NCR kadungan han pagsasalawad han petisyon para ha ₱1,200 nga makaburuhi nga suhol hadton Mayo 22. Igintuman nira an paggios ngan pagsubmiter ha iginpatawag nga konsultasyon ha suhol han RTWPB NCR.

Hadton Hunyo 2, nagpiket an mga trabahaor ha atubangan han Kongreso para ig-insister an pagpasa han proposisyon nga ₱200 nga dugang-nga-suhol para ha ngatanan han trabahador ha nasyunal nga lupgop. Duha kaadlaw kahuman hini, iginpasar han Kongreso an nasering nga proposisyon ha ikatulo nga pagbasa. Sering nira, bisan kun hirayo kaupay pa gihapon an dugang nga ₱200 ha ₱1,200 nga makaburuhi nga suhol, kinahanglan na ini aprubahan ha gilayon ngan pirmahan ni Ferdinand Marcos Jr.

NCAP ngan jeepney phaseout, igpabasura. Hadton Hunyo 2, nagkaraban an Stop NCAP Coalition ha mga mayor nga dalan ha Metro Manila ngan nagtirok ha atubangan han upisina han MMDA ha EDSA-Ortigas para igpabasura an No-Contact Apprehension Policy (NCAP). Sigon ha koalisyon, an NCAP iligal, kontra-kablas, ngan waray umagi ha tama nga proseso. Syahan na nga ginkwestyon han mga eksperto ha balaud ngan grupo ha tawhanon nga katungod an palisiya, labina kasumpay ha pankonstitusyon nga basaranan ngan mga proseso hini.

Nag-ukoy-pasada ngan nagprotesta an mga drayber ngan opereytor han dyip ha Panay ngan Negros agud igpabasura an Public Transportation Modernization Program (PTMP) ngan Local Public Transport Route Plan (LPTRP) hadton Hunyo 5 ngan Mayo 30. Kaparte ini han semana han protesta nga iginlansar han Piston tikang Hunyo 2 tubtub Hunyo 6.

Barikada ha Mayhaligue, Tondo. Napakyas han pagkaurusa ngan barikada han mga residente han Mayhaligue Street ha Barangay 262 ngan 264 ha Zone 24, Tondo, Manila an demolisyon nga iginlansar han mga pwersa han estado hadton Mayo 26. Upat an iligal nga gin-aresto han mga pulis ha komprontasyon. Masobra 400 nga pamilya o haros 2,000 nga indibidwal an mawawarayan han puruy-anan ha plano nga demolisyon ngan pag-aangkon han kompaniya nga 2288 Ethan Realty Corporation. Temporaryo nga iginpapahunong han usa nga korte ha Manila an demolisyon kasunod han pagpabor ha petisyon para ha temporary restraining order (TRO) hadton Mayo 27.

Demolisyon ha Davao City. Diri mamenos ha 400 nga pamilya an napalayas ha iginhimo nga demolisyon han 500-katawo nga pwersa nga gin-aapihan han 300 nga pulis, ha Upper Arroyo, Barangay Matina Crossing, Davao City hadton Mayo 23. Umabot ha 80 nga balay an ginruba ha demolisyon diin apektado an 60 nga kalagsan ngan diri mamenos ha 200 nga kabataan. Usa nga mando han korte an gin-gamit agud ipatuman an demolisyon kundi para la ini ha pito nga kabablayan ha nasering nga distrito. Temporaryo nga napahunong an demolisyon pinaagi han TRO nga nakuha han mga residente hadton Mayo 24.