Duha ka sibilyan sa Negros ang nareport nga napatay tungod sa pagpanggamo sang militar sa ila mga komunidad sadtong Mayo. Samtang, tayuyon ang pagpang-abuso sang mga soldado sa Albay, Masbate, Bohol kag Metro Manila.

Sa Negros Occidental, nareport nga napatay ang iloy nga si Lolita Reman sa Sityo Toril, Barangay Bandila, Toboso sadtong Mayo 20, tungod sang grabe nga kahadlok kag troma sa mga operasyon sang 79th IB sa lugar. Gin-reyd kag ginransak sang mga soldado sang 79th IB ang balay nga ginapanag-iyahan sang pamilya Mahusay kon diin yara ini nga iloy.

Amo man nga insidente ang natabo sa Barangay Minapasok, Calatrava. Gin-atake sang stroke ang mangunguma nga si Boyet de Asis sadtong Mayo 23 tungod sa pagpamahog sa iya sang pito ka soldado sang 79th IB kag mga traidor nga sila Marlon Basalo kag alyas Jonel/Mike sa Sityo Kapanuya.

Sadtong Mayo 31, pilit nga ginsulod kag ginransak sang mga soldado sang 79th IB ang balay sang magtiayon nga sanday Alejandro kag Maricel Villamero sa Sityo Manaysay, Barangay Cambayobo, Calatrava. Ginkawat sang mga soldado ang masobra ₱7,000 nga madugay nga gintipon nga kwarta sang magtiayon.

Sa Masbate, ginpaidalum sa mapintas nga interogasyon sang mga soldado sang 96th MICO ang 12 ka sibilyan halin sa Uson, Masbate sadtong katapusan nga semana sang Mayo. Pilit sila nga ginapaako nga may yara sila sang kahilabtanan sa BHB. Naglala ang balatian sang isa sa mga biktima pagkatapos sang interogasyon kag nabudlayan ini nga maghambal pagkatapos atakehon sang balatian sa korason kag diabetes tungod sa kahadlok kag troma.

Sa Negros Oriental, ginkadtuan sang mga soldado ang balay sang mangunguma nga si Alan Garde sa Barangay Sandayao, Guihulngan City sadtong Mayo 15. Pilit nga ginapaako si Garde nga may kahilabtanan kag nagasuporta siya sa BHB. Sa adlaw man nga ini, ginsulod sang mga soldado ang balay ni Rocky Fat kag ginransak sang mga soldado. Ginpagwa sang mga soldado nga may nakumpiskar nga armas halin sa iya kag gintilawan nga dakpon apang nanindugan ang iya pamilya batuk diri.

Halin Mayo 3, ginpaidalum sang 83rd IB sa mala-layi militar nga paghari ang tatlo ka barangay sa Caramoan, Camarines Sur. Ginharas, ginpaandaman kag ginpasibangdan ang mga residente sang komunidad, partikular ang anom ka indibidwal, nga mga himata ukon tagasuporta sang BHB. Ang pila sa mga biktima ginapilit sang militar nga ipaguwa kag “pasungkaon” ang ila mga bana nga ginapasibangdan nga mga Pulang hangaway. Pila ka beses man nga pilit nga ginsulod ang balay sang mga residente kag iligal nga ginkuhaan sila sang litrato sang mga soldado.

Sa Northern Samar, ginpaidalum sa hamlet sang AFP ang mga barangay sa Catubig, Las Navas, Gamay, Mapanas kag Palapag sugod sadtong Hunyo 4. Ginpatuman ini sang militar pagkatapos sang siling engkwentro sang AFP kag BHB sa adlaw nga ini sa Barangay Nagoocan, Catubig. Gindumilian nga magguwa sa baryo ang mga residente bisan pa sa kaugalingon nga ulumhan, katambi nga baryo, ukon sa banwa lang sila magkadto. Antes sini, lapnagon ang pagpamilit sang militar sa mga residente sa banwa sang Palapag nga “pasungkaon” ang ila mga himata nga ginapasibangdan nga hangaway sang BHB.

Pagpang-aresto kag pagpasaka sang himo-himo nga kaso. Gin-aresto sa kaso nga illegal possession of firearms and explosives kag ginpasibangdan nga katapo sang BHB si “Ruben”, 47, trabahante sa konstruksyon kag residente sang Barangay Namantao, Daraga, Albay. Gin-abdak siya sang mga elemento sang 31st IB sa iya balay sadtong Mayo 23 kag gindala sa isa ka bakante nga balay. Nagpalupok sang pusil ang mga soldado para paggwaon nga may natabo nga engkwentro.

Sa Bohol, nagpalapta sang peke nga balita kag impormasyon ang CIDG sadtong Mayo 23 batuk kay Carmilo Tabada, konsehal sa isa ka barangay sa banwa sang Trinidad. Ginapasibangdan siya nga opisyal sa pinansya sang PKP kag ginasiling nga gin-aresto tungod sa kaso nga “terrorism financing.” Ginklaro ni Tabada nga siya mismo ang nagkadto sa korte kag nagpyansa kaangot sa kaso.