Atubangan sa nagkagrabe nga krisis sa ekonomiya ug lapad nga pagkaguba sa panginabuhi sa masang anakpawis, padayon nga mibarog ang mga mamumuo ug kabus-sa-kasyudaran. Misukol sila pinaagi sa paglunsad og mga piket, welga, hunong-pasada ug barikadang bayan.

Welga sa Kawasaki. Nagwelga ang 140 ka mamumuo sa Kawasaki Motors Phils. Corporation (KMPC) sa pagpanguna sa Kawasaki United Labor Union niadtong Mayo 21 tungod sa pagka-delatar sa negosasyon sa collective bargaining agreement (CBA) tali sa management ug unyon. Nakamuntar ang piketlayn sa unyon atubangan sa hedkwarters sa kumpanya sa Muntinlupa City. Nanawagan sila og makabuhi nga suhulan, makatarunganong mga benepisyo ug pag-ila sa katungod sa mga mamumuo.

Pakigbisog sa mga drayber sa Lucena City. Halos duha ka bulan nga nagwelga ang mga drayber ug mga trabahante sa FOC Transportation Corporation sa terminal niini sa Barangay Comon, Infanta, Quezon. Ang mga bus nagabyahe sa rutang Infanta-Lucena City. Gikasa ang welga tungod sa paghikaw sa makatarunganong separation pay ug sa wala pag-atubang sa kumpanya sa negosasyon. Imbis nga tubagon ang mga reklamo sa mga trabahante, gipasakahan na hinuon sa kumpanya og kasong grave coercion ug illegal strike ang mga trabahante ug mga organisador sa pederasyon sa unyon.

₱1,200 nga makabuhing suhulan. Nagpiket ang mga mamumuo gikan sa National Capital Region (NCR) sa pagpanguna sa Unity for Wage Increase Now sa Regional Tripartite Wages and Productivity Board-NCR dungan ang pagsumite og petisyon alang sa ₱1,200 nga makabuhi nga suhulan niadtong Mayo 22. Giatol nila ang aksyon ug pagsumite sa gipatawag nga konsultasyon sa sweldo sa RTWPB NCR.

Niadtong Hunyo 2, nagpiket ang mga mamumuo atubangan sa Kongreso aron iduso ang pag-aproba sa sugyot balaudnon nga ₱200 nga dugang sweldo para sa tanang mamumuo sa tibuok nasud. Duha ka adlaw human niini, giaprubahan sa Kongreso ang maong balaudnon sa ikatulong pagbasa. Matud nila, bisan og layo pa gihapon ang dugang nga ₱200 gikan sa ₱1,200 nga makabuhi nga suhulan, kinahanglan kining maaprubahan ug pirmahan dayon ni Ferdinand Marcos Jr.

NCAP ug jeepney phaseout, ipabasura. Niadtong Hunyo 2, nagkaraban ang Stop NCAP Coalition sa mga mayor nga kalsada sa Metro Manila ug nagtapok sa atubangan sa upisina sa MMDA sa EDSA-Ortigas aron ipabasura ang No-Contact Apprehension Policy (NCAP). Sumala sa koalisyon, ang NCAP ilegal, kontra-kabus, ug wala miagi sa hustong proseso. Gi-question na usab kini sa mga eksperto sa balaod ug grupo sa tawhanong katungod, ilabina sa konstitusyonalidad ug proseso niini.

Naghunong-pasada ug nagprotesta ang mga drayber ug opereytor sa dyip sa Panay ug Negros aron ipabasura ang Public Transportation Modernization Program (PTMP) ug Local Public Transport Route Plan (LPTRP) niadtong Hunyo 5 ug Mayo 30. Kabahin kini sa ‘semana sa protesta’ nga gilunsad sa Piston gikan Hunyo 2 hangtud Hunyo 6.

Barikada sa Mayhaligue, Tondo. Napakyas sa panaghiusa ug barikada sa mga residente sa Mayhaligue Street sa Barangay 262 ug 264 sa Zone 24, Tondo, Manila ang demolisyon nga gipahigayon sa mga pwersa sa estado niadtong Mayo 26. Upat ang iligal nga giaresto sa komprontasyon. Kapin sa 400 ka pamilya o halos 2,000 ka indibidwal ang mawagtangan og balay tungod sa plano nga demolisyon ug pagpang-angkon sa kumpanyang 2288 Ethan Realty Corporation. Temporaryong gipahunong sa usa ka korte sa Maynila ang demolisyon human paboran ang petisyon para sa temporary restraining order (TRO) niadtong Mayo 27.

Demolisyon sa Davao City. Dili moubos sa 400 ka pamilya ang napalayas sa demolisyon nga gihimo sa 500-ka tawong pwersa nga naglakip sa 300 ka pulis sa Upper Arroyo, Barangay Matina Crossing, Davao City niadtong Mayo 23. Mikabat sa 80 ka balay sa gidemolis diin naapektuhan ang 60 ka tigulang ug dili moubos sa 200 ka mga bata. Usa ka kamandoan sa korte ang gigamit aron ipatuman ang demolisyon apan alang ra kini sa pito ka balay sa maong distrito. Temporaryong napahunong ang demolisyon pinaagi sa TRO nga nakuha sa mga residente niadtong Mayo 24.