Nagtipon sa Nairobi, Kenya sa Africa sadtong Mayo 23-24 ang 110 ka indibidwal nga nagatiglawas sa 28 ka partido proletaryo-sosyalista, pormasyon kontra-imperyalista, organisasyon sa pagpanalawsaw, kag progresibong kahublagan sang pumuluyo halin sa 20 ka pungsod sa lima ka kontinente para sa isa ka teoritikal nga kumperensya. Sa pagpanguna sang National Democratic Front of the Philippines (NDFP) kag sang Communist Party Marxist Kenya (CPMK), nangin madinalag-on ang kumperensya nga nagtalakay sa burukrata kag kumprador nga kapitalismo sa mga neokolonya.

Ang kumperensya, nga gintig-ulohan Pangkalibutanon nga Kumperensya Teoritikal Nahanungod sa Kumprador kag Burukrata Kapitalismo sa mga Neokolonya, ang ikaapat sa serye sang mga kumperensya nga ginlunsar sang NDFP nga nagatalakay sa malahalon nga hambalanon sa teorya. Ini ang una nga kumperensya nga ginhiwat sa Africa. Gintalakay sa kumperensya ang 21 ka artikulo nga ginsulat sang mga komunista kag proletaryo-sosyalista nga partido kag mga kontra-imperyalista nga organisasyon nga nagapamuno sa kahublagan para sa kahilwayan sa Congo, Cyprus, Guatemala, Indonesia, Iraq, Ireland, Kenya, Kurdistan, Nepal, Pakistan, Palestine, Pilipinas, Sudan, South Sudan, Turkey, Uganda, kag Zambia.

Ang duha ka adlaw nga kumperensya nagserbe nga higayon para mahapag ang Marxista-Leninista nga pag-analisa sa nagaluntad nga moda sang produksyon sa lain-lain nga pungsod. Partikular nga gin-analisa diri ang istorikal nga pag-uswag sang mga mga neokolonya nga sosyedad sa idalum sang kontrol sang imperyalismo.

Gin-analisa sang mga delegado sang kumperensya ang materyal nga ugat sang burukrata kapitalismo kag kapitalismong kumprador, sandig sa mga sinulat ni Lenin kag Mao tuhoy sa mala-kolonyal kag mala-pyudal nga paghari, subongman ang mga padihot kag tikang sang imperyalismong US agud mapabilin ang kontrol sa mga neokolonya.

Gintun-an man ang papel sang lain-lain nga sahi sa mga neokolonya bilang mga lokal nga ahente sang pagpangkawkaw sa ekonomiya, kag pagsunod-sunod sa pulitika kag militar sa ngalan sang interes sang imperyalismo. Nagpakigbahin ang mga delegado sa madalum nga talakayan para magpadalum kag magbayluhanay sang pag-analisa sa mga kondisyon nga nag-anak sang mga istruktura mala-kolonyal kag mala-pyudal nga sosyedad sa ila matag mga pungsod.

Gintalakay man ang mga praktikal nga hambalanon nga may kaangtanan sa rebolusyonaryong hilikuton kag pagsulong sang mga kahublagan sang pumuluyo,ilabi na sa konteksto sang burukrata kapitalismo. Gin-analisa sang mga tumalambong ang mga estratehiya para sa pag-organisa sang mga partikular nga sahi sang sosyedad, pareho sang mala-proletaryado, kag gintun-an kon paano ginahorma sang nagalala nga pangkalibutanon nga krisis kag nagadalum nga imperyalistang agresyon ang pag-uswag sang mga pwersang rebolusyonaryo, kag sang mas malapad nga kahublagan Makawala sa ila mga pungsod kag rehiyon.

Ang artikulo nga ginpaambit halin sa Pilipinas ginsulat sang Komite Sentral sang Partido Komunista ng Pilipinas. Ginbaybay sang artikulo ang kasaysayan sang pagtuhaw sang kumprador kag burukrata kapitalismo sa pungsod nga resulta sang paghari sang imperyalismong US paagi sa ahente sini sa ekonomiya kag pulitika. Ginpaathag man diri ang papel sang kumprador kag burukrata kapitalista para mapabilin ang mala-kolonyal kag mala-pyudal nga sosyedad Pilipino.

Sa pagtapos sang kumperensya, nagpahayag sang pagpakig-isa ang mga delegado sa ginasaulog nga African Liberation Day sadtong Mayo 25 bilang paghanduraw sa pagtukod sang Organization of African Unity, nga sang ulihi nangin African Union. Gintukod ang OAU agud isulong ang paghiliusa kag pagbuligay sang kontra-kolonyal nga mga kahublagan para sa kahilwayan kag bag-ong tuhaw nga mga independyente nga gobyerno sa 30 ka pungsod African sadtong 1960.

Ginmarkahan nila ini bilang kabahin sang komun nga paghimakas sang ginapigos nga mga pumuluyo batuk sa imperyalismo kag tanan nga mga reaksyon. Ginpalig-on sang kumperensya ang pagpakig-isa sa mga pwersang kontra-imperyalista kag proletaryo-sosyalista sa nagapadayon nga pagka-signipikante sang mga kahublagan para sa kahilwayan sa Africa nga kabahin sang mas masangkad nga mga paghimakas para sa kaugalingon nga pagbuot kag sosyalismo.