Sugod sang liwat nagpungko si Donald Trump bilang Presidente sang US sining Enero, wala puas ang lapnagon nga pag-atake, pagpanglagas, pilit kag arbitraryo nga pagpalayas ukon deportasyon sa mga mamumugon nga imigrante sa US. Halin Enero tubtob Mayo naglab-ot na sa masobra sa 271,000 ka mga imigrante ang ginpadeport sang administrasyon samtang indi magnubo sa 49,184 ka imigrante ang subong nakadetine sa lain-lain nga pasilidad sang Immigration and Customs Enforcement (ICE) sa US.

Suno sa embahada sang Pilipinas kag base sa mga kaso nga ginauyatan sang Tanggol Migrante, ginabana-bana nga indi magnubo sa 30 ka Pilipino nga imigrante ang nareport nga napadeport subong nga tuig. Indi makuha ang eksakto nga isip sang nakadetine ukon nadeport sang ICE tungod wala ini sang ginabantala nga impormasyon.

Yara sa 150,000–370,000 ang Pilipino nga wala sang dokumento ukon iligal nga nagapuyo sa US.

Suno sa Bayan USA, indi bastante ang ginahimo nga aksyon sang embahada sang Pilipinas sa US kag mga konsulado sini para sa mga Pilipino nga imigrante nga nabilanggo kag natalana nga paulion. Grabe ang ila pagpatumbaya kag kawad-on sang pagpasilabot sa mga Pilipino nga imigrante nga nagapangita sang bulig. Bisan ang ayuda nga Assistance to the National Fund sang embahada ginadingot sa mga nagakinahanglan.

Sa atubang sang pagpatumbaya sang rehimen US-Marcos, padayon ang pagkampanya kag pag-organisa sang mga organisasyon sa US sa pagpanguna sang Tanggol Migrante, mga alyado nga organisasyon, kag mga Pilipino sa komunidad. Naglunsar sila sang lain-lain nga aktibidad kaangay sang press conference, rali, pagbisita sa mga nakadetine, pagpadala sang sulat sa mga hukmanan kag pagkalap sang donasyon para sa gilayon nga paghilway sa mga gin-detine kag pagbulig sa ila mga pamilya.

Tungod sa ululupod nga paghulag sang mga pumuluyo sa US, nahimo nila nga mahilway si Michelle (indi matuod nga ngalan) sadtong Abril 30 kag si Lewelyn Dixon sadtong Mayo 29, pareho nga gin-detine sa NorthWest ICE Detention Center (NWDC) sa Tacoma, Washington.

Nakadeteni pa gihapon sanday Maximo Londorio, Rodante Rivera, Ligaya Jensen kag Alma Bowman, nga mga residente sang US nga pila na dekada nga nagapuyo diri.

Nagapanawagan naman ang mga demokratikong organisasyon sa US sang gilayon nga aksyon gikan sa gobyerno sang Pilipinas. Siling nila, dapat sini hatagan sang nagakaigo nga suporta ang tanan nga imigrante, lakip ang nagaatubang sa deportasyon, trafficking ukon pagpangawat sang sweldo. Nagapanawagan man sila kay Ambassador Jose Manuel Romualdez nga magpanaog na lang sa pwesto kon indi niya masarangan nga tungdan ang iya trabaho nga pagpangapin sa mga Pilipino sa US.