Bistahon si Sara Duterte. Nagprotesta sa Senado sa Pasay City ang mga progresibo nga grupo sadtong Hunyo 3 agud manawagan nga sugdan na ang hungod nga ginpaatrasar nga pagbista sa kaso nga impeachment ni Vice President Sara Duterte. Ginbatikos nila ang pagpa-atrasar gamit ang madamo nga palusot sang Senado agud sugdan ini. Sadtong Pebrero pa nasumite sang House of Representatives ang mga artikulo sang impeachment.

Wala-tuo man ang pagbatikos sa Senado tungod sa paglapas sini bisan sa Konstitusyon 1987 tungod sa pagka-atrasar sang pagbista. Isa na diri ang mga propesor sang University of the Philippines College of Law. Samtang, natalana nga maglunsar sang lapnagon nga protesta sa Hunyo 11, adlaw sang pag-hearing sang Senado sa impeachment, ang lain-lain nga grupo sa pagpanguna sang Taumbayan Ayaw sa Magnanakaw at Abusado Network Alliance (TAMA NA).

Away, mangingisda. Naglunsar sang fluvial parade ukon parada sang mga bangka ang Pamalakaya kag Save Laguna Lake Movement sa Muntinlupa City sadtong Mayo 31, pungsodnon nga adlaw sang mga mangingisda, agud ipanawagan ang pagbasura sa mapangwasak nga Laguna Lake Roadshore Network Project kag 2,000-ektarya nga floating solar power project sa Laguna de Bay.

Sadtong Mayo 30, ululupod nga nagmartsa ang pila ka gatos ka mangingisda, mga tagasuporta kag tigtib-ong sang kapalibutan padulong sa Mendiola sa Manila. Nagapanawagan sila sang pagpangapin sa kinamatarung sang mga mangingisda, pagpamatuk sa reklamasyon, kag pagbawi sa pamatbat sang Korte Suprema tuhoy sa 15-kilometro nga municipal waters.

Hustisya para kay Junver. Nagsindi sang mga kandila ang mga estudyante sang University of Santo Tomas sa kampus sini sa Manila sadtong Mayo 29 bilang panawagan sang hustisya sa pagkapatay ni Junver Toledo, 22, pareho nila nga estudyante. Nareport ang pagkapatay ni Toledo, isa ka estudyante sa UST College of Rehabilitation Sciences sadtong Mayo 17 tungod sa presyur sa pag-eskwela.

Hilwayon ang mga bilanggong pulitikal. Naglunsar sang piket-protesta ang Karapatan-National Capital Region sa atubang sang Quezon City Hall of Justice sadtong Mayo 20. Panawagan nila nga gilayon nga hilwayon kag ibasura ang mga kaso nga illegal possession of firearms and explosives batuk sa mga unyonista nga sanday Mark Ryan Cruz, Romina Astudillo, kag Jaymie Gregorio, nga kabahin sang Human Rights Day 7. Natalana ang pagbista sa adlaw nga ini apang wala nag-abot ang tigbista tungod “nagbakasyon” kuno ini gani ginsaylo ang pagbista sa Agosto.