Hayagan nga pagtapak sa sobereniya sang Pilipinas ang presensya sang linibo ka soldadong Amerikano, Australian kag iban pa nga dumuluong nga tropa sa teritoryo sang pungsod para sa pagpangsulsol kag mga dalagko nga mga war games. Halin Mayo, tatlo diri ang dululungan nga ginlunsar sang US, isa paagi sa kaupod sini nga hukbo sang Australia. Ang mga ini amo ang Kamandag (Mayo 26-Hunyo 6), Kasangga (Mayo 19-Hunyo 24) kag Salaknib 2025 Phase 2 (Mayo 19-Hulyo 20).

Ginlunsar ang Kamandag sa Batanes; sa Capas, Tarlac kon diin ginahiwat ang live-fire drills kag sa Burgos, Ilocos Norte kon diin ginalunsar ang isa ka maritime strike operation. May yara man mga aktibidad sa Palawan kag iban pa nga bahin sang Luzon kag sa Tawi-tawi sa Mindanao.

Gingamit sang mga tropa sang US kag Pilipinas ang Navy-Marine Expeditionary Ship Interdiction System (NMESIS) kag High Mobility Artillery Rocket System ukon HIMARS sa Kamandag. Ang NMESIS isa ka sistema sang misayl nga anti-ship ukon pagpalupok sang barko. Ginakarga ini sa isa ka unmanned ground vehicle (dako nga trak) nga ginatawag nga ROGUE Fires Carrier kag may karga nga Naval Strike Missile (NSM).

Nagpakigbahin sa war games ang 2,031 ka soldado sang US Marine Corp kag 2,028 ka pwersa nga halin sa Pilipinas. May yara man mga tinawo militar halin sa South Korea, Japan kag United Kingdom nga nagpakigbahin sa war games. Nagaserbe naman nga “obserber” ang mga tinawo halin sa France, Canada, Bahrain, Australia, Indonesia, Thailand kag Netherlands.

Ang Kasangga ginbuksan sa kampo sang 4th ID sa Cagayan de Oro City kag ginpatigayon sa Camp Kibaritan, Kalilangan, Bukidnon. Indi magnubo sa 90 ka soldado halin sa Australian Army kag 140 ka soldado sang Philippine Army ang nagpakigbahin sa war games. Magadugay tubtob Hunyo 24 ang Kasangga.

Samtang, ang Salaknib sang US kag Pilipinas ginalunsar subong sa Northern Luzon.

Ang mga war games nga ini ginalunsar sa pungsod para hugton sang US ang kontrol sini sa AFP, suno sa Partido Komunista ng Pilipinas (PKP).

“Nagapamatuk ang pumuluyong Pilipino sa mga war games nga ini. Dugang sa ginadala sini nga peligro sa mga Pilipino, peste pa ini sa residente nga ginadingutan sang palangabuhian para hatagan ligwa ang mga paghanas,” suno kay Marco Valbuena, pinuno nga opisyal sa impormasyon sang PKP.

Ang madamuan kag dasok nga war games kag ang pagpaido-ido sang AFP kag sang rehimen Marcos ang rason kon nga-a ginakabig sang madamo nga pungsod sa Asia ang Pilipinas bilang proxy sang US, suno sa PKP. Indi bulag ang mga kaiping nga pungsod sa Asia sa pagka sunod-sunoran ni Marcos kag mga heneral sini sa direksyon kag plano sang US.