Hugot nga ginabatikos ni Atty. Carlos Zarate, anay tiglawas sang Bayan Muna, ang plano sang rehimen US-Marcos nga isapribado ang Caliraya-Botocan-Kalayaan (CBK) complex. Siling niya, magadulot lang ini sang grabe nga pagmahal sang sukot sa kuryente nga dugang nga palas-anon sang pumuluyo nga nagasalig sa serbisyo.

“Ang gobyerno dapat ang may kontrol sa mga nagapanguna nga serbisyo pareho sang kuryente. Imbes nga ibaligya ang CBK, dapat ini nga himuon nga modelo sang renewable energy nga magpanubo sang sukot sa kuryente para sa tanan,” dugang ni Zarate.

Natalana ang pribatisasyon sang CBK complex sa katapusan sang Hunyo subong nga tuig. Suno sa Department of Finance (DOF) pwede mag-ganar ang gobyerno sang ₱50 bilyon ($897.99 milyon) tubtob ₱100 bilyon halin sa pagpribatisa sang pasilidad.

Ang 728 megawatt (MW) Caliraya-Botocan-Kalayaan hydropower complex ang bugtong nga nagagana nga hydroelectric facility nga ginapanag-iyahan sang Pilipinas. Ini man ang pinakadaan nga hydropower plant sa pungsod.

Ginabug-os ang CBK complex sang Botocan hydro electric power plant (HEPP) nga gintukod sadtong 1939 nga may 20.8 MW nga kapasidad, sang Caliraya HEPP nga gintukod sadtong 1942 nga may kapasidad nga 22MW, kag ang Kalayaan pump storage power plant nga gintukod sadtong 1983. Nagatindog ang mga planta sa mga barangay sa Kalayaan, Lumban kag Majayjay sa Laguna.

Ang complex una nga ginpauswag sa idalum sang National Power Corporation (NAPOCOR). Sadtong Pebrero 7, 2001, opisyal nga ginadumalahan sang CBK Power Company Limited ang pagdumala sa CBK complex sa idalum sang Built-Rehabilitate-Operate-Transfer scheme sang gobyerno sang Pilipinas paagi sa NAPOCOR nga magatapos pagkatapos sang 25 ka tuig.

Sadtong Abril 2005, nakuha halin sa orihinal nga tag-iya ang CBK BROT Agreement sang duha ka Japanese nga kumpaniya—ang Electric Power Development Co., Ltd (J-Power) kag Sumitomo Corporation. Matapos ang kontrata sini sa Pebrero 2026.

Ang CBK complex isa sa tatlo nga nabilin nga dalagko nga planta sang kuryente nga ginapanag-iyahan sang gobyerno. Ginpaidalum ang mga ini sa Power Sector Assets and Liabilities Management Corporation (PSALM) para sa pribatisasyon sang mga pasilidad. Ang duha pa nga natalana naman nga ibaligya amo ang 932MW Agus-Pulangui hydropower complex sa Mindanao grid; kag ang 210MW Mindanao coal plant.