Nagahatag sang pagsaludo ang Partido Komunista ng Pilipinas (PKP) kay Kaupod Basavaraju (Nambala Keshava Rao), sekretaryo heneral sang Communist Party of India (Maoist), nga namartir kaupod ang 27 ka iban pa sadtong Mayo 21. Ginpatay sila sang mga pwersa sang estado sa India sa ginatawag nga Masaker sa Gundekote, sa Abhujmad sa distrito sang Narayanpur sa Chhattisgarh, India.

Nagasilak subong ang ngalan ni Kaupod Basavaraju sa kubay sang mga imortal nga baganihan sa epiko nga inaway banwa sa India kag sang mga rebolusyonaryong paghimakas para sa pungsodnon nga kahilwayan kag sosyalismo sa bug-os nga kalibutan. Gin-uyatan niya ang solo sang armadong paghimakas sa India kag nagserbe nga iwag sa banas sang pangkalibutanon nga rebolusyon proletaryo, ilabina sa mga nagligad nga dekada sang mga kapaslawan kag pagkapierde sang mga pwersang sosyalista sa lain-lain nga bahin sang kalibutan.

Sin-o si Kaupod Basavaraju?

Nabun-ag si Kaupod Basavaraju sadtong 1955 sa pamilya sang mga mangunguma sa komunidad sang Jiyannapetta sa distrito sang Srikakulam, Andhra Pradesh nga yara sa sur sidlakan sang India. Nag-eskwela siya sang elementarya kag hayskul sa ila distrito kag nagkadto sa syudad sang Warangal sa katambi nga estado sang Telangana para mag-eskwela sang inhenyero sa kolehiyo.

Samtang yara sa kolehiyo, napukaw siya sa kahimtangan kag paghimakas sang pumuluyong Indian rason para magpakigbahin siya sa kahublagan estudyante. Sadtong dekada 1980, nangin kabahin kag nagtungod siya sang yabe nga katungdanan sa CPI (Marxist-Leninist) People’s War. Nangin katapo siya sang komite sentral sang Partido sadtong 1992.

Sadtong 2004, kalakip siya sa mga nagpanguna sa pag-isa sang CPI (ML) People’s War kag sang Maoist Communist Centre of India (MCCI) para tukuron ang CPI (Maoist). Isa siya sa mga nagtukod sang hukbo sang banwa sang India nga People’s Liberation Guerilla Army (PLGA) sadtong 2000. Ginpamunuan niya ini sa malawig nga panahon kag nagpanguna sa madamo nga kadalag-an sa pagtukod sang mga rebolusyonaryong base kag paglunsar sang mga taktikal nga opensiba batuk sa mga pwersang pasista.

Nagserbe siya nga katapo sang Komite Sentral sa sulod sang 33 ka tuig kag sang Politburo sa sulod sang 25 ka tuig. Ginpamunuan niya sa malawig nga panahon ang Sentral nga Komisyong Militar sang CPI (Maoist). Sadtong ulihi nga bahin sang 2018, ginpili siya sang Komite Sentral bilang heneral nga sekretaryo sang CPI (Maoist) kag nagbulos sa pagpamuno ni Kaupod Ganapathy.

Panawagan para sa hustisya

Hustisya ang ululupod nga singgitan sang pumuluyong Indian kag mga internasyunal nga partido kag organisasyon sa pagpatay kay Kaupod Basavaraju kag 27 ka iban pa nga mga kaupod. Nalista sa Masaker sa Gundekote ang mga paglapas sa internasyunal nga makatawo nga layi kag mga pagsulundan sa gyera.

Suno sa report sang Dandakaranya Special Zonal Committee sang CPI (Maoist), ang 27 ka mga kaupod nga mga katapo sang CPI (Maoist) kag hangaway sang PLGA napatay sa pagkubkob sang linibo ka militar kag pulis sang reaksyonaryong estado sa ila kampo. Ginbuyagyag sang komite nga pagkatapos sang mga inaway buhi nga nadakop si Kaupod Basavaraju kag hungod nga ginpatay sang mga berdugo nga tinawo sang rehimen Modi.

Ang brutal nga Masaker sa Gundekote kabahin sang teroristang kampanya nga Operation Kagaar. Ginsugdan ang operasyon sadtong Enero 2024 kon diin naggamit sang linibo ka armadong pwersa ang reaksyonaryong estado, nagtukod sang ginatos ka mga detatsment militar kag nagpatuman sang kampanya sang pagpatay kag terorismo batuk mayor sa mga Adivasi, ukon tumandok sang India.

Sa subong, ginaduso sang lain-lain nga demokratikong organisasyon sa India ang imbestigasyon sa Masaker sa Gundekote. Gusto nila nga pasabton ang rehimen Modi kag mga opisyal militar sini sa grabe nga mga krimen.

Samtang, ginpahayag sang Komite Sentral sang PKP ang lubos nga pagsalig sa Komite Sentral sang CPI (Maoist) nga gilayon ini magpili sang isa ka pinuno nga kapareho ang pagkasampaton kay Kaupod Basavaraju agud akuon ang gin-uyatan niya nga mga responsibilidad. Siling sang pamunuan, kumpyansa ini nga sa pag-isa sang kinaalam sang mga tigulang nga kadre kag sang kapagsik kag kaalam sang mga huben nga kadre, mapangibabawan sang CPI (Maoist) ang tanan nga pagtilaw, magpadayon sa banas sang rebolusyonaryong armadong paghimakas, kag makaagum sang labi pa nga kadalag-an sa inaway banwa sa India.