Iti sango ti kumarkaro a krisis iti ekonomya ken nasaknap a panangdadael iti pagbiagan ti masa nga anakling-et, agtultuloy a tumaktakder dagiti mangmangged ken nakurapay iti syudad. Lumablaban da babaen ti panangisayangkat kadagiti piket, welga, sardeng-pasada ken barikada ti umili.

Welga iti Kawasaki. Nagwelga ti 140 mangmangged ti Kawasaki Motors Phils. Corporation (KMPC) iti panangiyuna ti Kawasaki United Labor Union idi Mayo 21 gapu iti saan a panaggunay ti negosasyon iti collective bargaining agreement (CBA) iti baet ti administrasyon ken unyon. Nakatakder ti piketlayn ti unyon iti sango ti hedkwarters ti kumpanya idiay Muntinlupa City. Immawag da ti makabiag a sweldo, nainkalintegan a benepisyo ken panangbigbig iti karbengan dagiti mangmangged.

Laban dagiti drayber idiay Lucena City. Dandani dua a bulanen a nakawelga dagiti drayber ken mangmangged ti FOC Transportation Corporation iti terminal daytoy idiay Barangay Comon, Infanta, Quezon. Dagiti bus ket agbibyahe iti ruta nga Infanta-Lucena City. Inputok dagiti drayber ken mangmangged ti welga gapu iti panangipaidam kadakuada iti nainkalintegan a separation pay ken saan a panagsango ti kumpanya iti negosasyon. Imbes a sungbatan dagiti arungaing da, pinilaan ti kumpanya ti kaso a grave coercion ken illegal strike dagiti mangmangged ti kumpanya ken organisador ti pederasyon ti unyon.

₱1,200 makabiag a sweldo. Nagpiket dagiti mangmangged manipud iti National Capital Region (NCR) iti panangiyuna ti Unity for Wage Increase Now iti Regional Tripartite Wages and Productivity Board-NCR kagiddan ti panangipila ti petisyon para iti ₱1,200 makabiag a sweldo idi Mayo 22. Inrana da ti tignay ken panagisumite iti inyawag a konsultasyon iti sweldo ti RTWPB NCR.

Idi Hunyo 2, nagpiket dagiti mangmangged iti sango ti Kongreso tapno irupir ti panagipasa ti gakat a ₱200 para iti amin a mangmangged iti nailyan a saklaw. Dua nga aldaw kalpasan daytoy, inpasa ti Kongreso ti nasao a gakat iti maikatlo a panagdengngeg. Kunada, numan pay nakaad-adayo latta ti nayon a ₱200 iti ₱1,200 a makabiag a sweldo, rumbeng a dagus nga aprubaran ken pirmaanen ni Ferdinand Marcos Jr daytoy.

NCAP ken jeepney phaseout, ibasura. Idi Hunyo 2, nagkaraban ti Stop NCAP Coalition kadagiti mayor a dalan iti Metro Manila ken nagtitipon da iti sango ti upisina ti MMDA idiay EDSA-Ortigas tapno ipabasura ti No-Contact Apprehension Policy (NCAP). Segun iti koalisyon, ti NCAP ket iligal, kontra-marigrigat ken saan a dimmalan iti usto a proseso. Umuna, kinwestyon dagiti eksperto iti linteg ken grupo iti karbengan-tao ti patakaran, nangruna kanaig iti basaran a pang-konstitusyon ken dagiti proseso daytoy.

Nagsardeng-pasada ken nag-protesta dagiti tsuper ken opereytor ti dyip idiay Panay ken Negros tapno ipabasura ti Public Transportation Modernization Program (PTMP) ken Local Public Transport Route Plan (LPTRP) idi Hunyo 5 ken Mayo 30. Paset daytoy ti lawas ti protesta nga insayangkat ti Piston manipud Hunyo 2 agingga Hunyo 6.

Barikada idiay Mayhaligue, Tondo. Pinaay ti panagkaykaysa ken barikada dagiti residente ti Mayhaligue Street iti Barangay 262 ken 264 iti Zone 24, Tondo, Manila ti demolisyon nga insayangkat dagiti pwersa ti estado idi Mayo 26. Uppat ti iligal nga inaresto dagiti pulis iti kumprontasyon. Nasurok 400 a pamilya wenno dandani 2,000 indibidwal ti maawanan ti pagtaengan iti plano a demolisyon ken panangtagtagikua ti kumpanya a 2288 Ethan Realty Corporation. Temporaryo nga inpasardeng ti maysa a korte iti Manila ti demolisyon kasaruno ti panangkanunong iti petisyon para iti temporary restraining order (TRO) idi Mayo 27.

Demolisyon idiay Davao City. Saan a bumaba iti 400 pamilya ti napatalaw iti inyaramid a demolisyon ti 500-katao a pwersa a pakaibilangan ti 300 pulis, iti Upper Arroyo, Barangay Matina Crossing, Davao City idi Mayo 23. Dimmanon iti 80 balay ti narebba iti demolisyon nu sadinno nga apektado ti 60 natataengan ken saan a bumaba iti 200 ubbing. Maysa a mandar ti korte ti naaramat tapno ipatungpal ti demolisyon ngem para laeng daytoy iti pito a balbalay iti nasao a distrito. Temporaryo a naipasardeng ti demolisyon iti bileg ti TRO a naala dagiti residente idi Mayo 24.