Padayon nga nagadalum kag nagalala ang pag-antus sang pumuluyong Pilipino tungod sa mga programa kag patakaran sang rehimen Marcos nga kontra-imol, kontra-pumuluyo kag pabor sa mga dalagko nga kapitalistang dumuluong kag mga lokal nila nga ahente, mga agalon mayduta kag burukrata kapitalista.

Nagapagusa ang pamilya Marcos, mga kroni kag alipures sa pondo kag pribilehiyo sang gobyerno, samtang nagausmod ang kabuhi sang mayoriya sang mga Pilipino. Kayod-karabaw ang mga mamumugon kag masang anakbalhas. Tuman ka kulang ang suhol kag sweldo sa atubang sang padayon nga pagtimbuok sang presyo kag mga balayran. Minilyon ang wala sang trabaho. Tuman ka gamay nga kita nga naga-agi lang sa palad sang masang nagaantus. Nagadamo ang nagakapyot sa patalum para lang may maipakaon sa ila mga anak.

Tuman ang pagka-init sang pumuluyo sa rehimen Marcos sa kawad-on sang pagkabalaka sa masang lubong sa kapigaduhon, kag sa pagpalala sini sang krisis sa palangabuhian kag pag-antus sang pumuluyo. Nagapabungol-bungol si Marcos sa malapad nga mga panawagan sang pumuluyo. Ginabalewala niya ang singgit sang malapad nga masa para sa makabuhi nga suhol kag sweldo, trabaho, matuod nga reporma sa duta, kinamatarung sa katubigan, pagpadako sang badyet para sa libre nga serbisyo sosyal kag para palaparon ang lokal nga produksyon, kag iban pa nga hinanali nga mga demanda.

Imbes, masako si Marcos sa mga pakuno-kuno nga palagwaon nga wala nagadala sang kasulhayan sa pumuluyo, pareho sang dako nga drama sang pagbalasa sa gabinete (nga tatlo man lang ang gin-ilisan), pagpahambog sang ₱20 kada kilo nga bugas (nga magluwas sa pipila lang ang nagapulos temporaryo pa), libre nga sakay sa LRT (nga apat ka adlaw lang) kag kon ano-ano pa nga wala sang pulos nga gimik. Para bilugon ang ulo sang pumuluyo, nagapaguwa si Marcos kag iya mga upisyal sang mga estatistika agud tabunan ang padayon nga paglala sang krisis sa ekonomiya, pagsaka sa presyo sang mga balaklon, kag mas nga pagkalubong sa kapigaduhon sang minilyon nga Pilipino.

Tuman ang paglapak sang rehimen Marcos sa kinamatarung kag palangabuhian sang masang anakbalhas. Agud ganyaton ang mga dumuluong kapitalista nga magpangapital, ginalansang ni Marcos ang sweldo sang mga mamumugon agud himuslan ang ila barato nga kusog pangabudlay. Sa kaumhan, ginagamit ni Marcos ang pasista militar agud hatagan sang ligwa ang malaparan nga pagpang-agaw sang duta para sa mga plantasyon kag operasyon pagmina, nga nagapalayas sa ginatos ka libo nga mangunguma kag mga tumandok nga pumuluyo sa ila duta. Gina-agawan sang palangabuhian ang mga mangingisda, mga drayber, kag iban pa nga gagmay nga mga trabahador. Sa ngalan sang pagkinot, plano ni Marcos nga buhinan ang empleyado sang gobyerno nga mas nga magpalain sa serbisyo pangpubliko.

Paantus na sa pumuluyo, padayon pa nga ginabutang ni Marcos sa peligro ang kaluwasan sang pungsod, tungod sa bulag niya nga pagsunod sa mga dikta sang iya imperyalistang amo nga US. Nagapagamit si Marcos sa Indo-Pacific Strategy sang US para palibutan kag punggan ang pagbaskog sang China. Nagadamo ang mga base militar kag pasilidad sang US sa Pilipinas para mag-istasyon sang linibo ka tropang Amerikano sa lain-lain nga bahin sang pungsod. Ginaganoy ni Marcos ang Pilipinas sa gyera nga gusto nga palukpon sang US, sa wala lang-at nga paghiwat sang mga paghanas kag paghanda sa gyera, kag pag-imbak sang nagadamo nga mga mabaskog nga armas pang-gyera sang US nga gina-target sa karibal sini nga China.

Tungod sa pagpaantus kag pagtraidor sa pumuluyo, mas nga nagakaligwin ang nagahari nga rehimen sa pumuluyong Pilipino. Ginawasiwas ni Marcos ang Memorandum Circular No 83 agud bug-os kabangis nga ipatuman ang pasistang kakugmat agud ipiton ang pagbato sang pumuluyo. Apang indi mapunggan ni Marcos ang pagsulong sang militanteng kahublagan masa tungod yara sa likod sini ang linaksa ka pumuluyo nga determinado nga tapuson ang gutom kag pagpangsumpo.

Ginakonsolida ni Marcos ang iya poder sa pagpili sang masobra 200 ka heneral sa AFP kag pagbutang sang mga bag-o nga tinawo sa mga kumpaniya nga uyat sang gobyerno, samtang ginatay-og ini sang pangpulitika nga krisis sa atubang sang nagapadayon kag nagasingki nga bunggo-anay sang mga nagasumpunganay nga mga hubon.

Sa handum nga mapabilin sa poder ang ila pamilya, luyag ni Marcos nga lubos nga dugmukon ang mga Duterte agud punggan ang plano sang iya karibal nga magbalik sa poder sa 2028. Apang daw ginahampangan niya ang pumuluyo sa pag-atras-abante sang iya mga alipures sa Senado sa pagbista sa kaso nga impeachment kontra kay Vice President Sara Duterte, nagapakita sang pag-aregluhanay sang mga dunot nga reaksyonaryong hubon. Madasig nga nagalapta ang kalayo sang kaakig sang pumuluyo sa mga pagtinguha nga punggan ang pagbista kag pasabton si Sara Duterte sa pagwaldas sang kwarta sang pumuluyo kag iban pa nga mga mabug-at nga kasal-anan sa pumuluyo.

Wala sang ihatag nga kasulhayan ang burukrata kapitalista, pasista kag papet nga rehimen Marcos sa kabuhi sang pumuluyong Pilipino. Sa tunga sang nagatalum nga krisis,wala sang iban nga mapilian ang masa nga nagaantus kag pigos kundi ang maghimakas. Ginatulod sang sitwasyon ang mga mamumugon, mangunguma, mala-proletaryado kag iban pa nga pigos nga sahi kag sektor nga maghugpong agud ipakig-away ang ila mga palangabuhian kag mga demokratiko nga kinamatarung, kag ituon ang ila kaakig kag protesta sa rehimen Marcos, sa imperyalismong US kag mga pasistang gaway sini.

Sa mga pabrika, eskwelahan, sa mga komunidad, sa lain-lain nga banwa kag probinsya, tumuron ang mga hinanali nga problema kag demanda sang masa. Base diri, tukuron ang solidong kusog sang masa sa dagway sang mga unyon kag mga asosasyon, kag ipasaka ang ila kamuklatan. Magmartsa ukon magrali agud ipakita ang malaparan nila nga paghiliusa kag palanugon ang ila mga singgit. Pabaskugon ukon tukuron ang mga sanga sang Partido kag mga likom nga rebolusyonaryong organisasyon masa agud magserbe nga salsalon nga taludtod sang malapad nga masa. Ubayan sila sa ila mga paghimakas kag ipasaka ang mga ini sa pakig-away sa nagahari nga rehimen Marcos.

Dapat magpanikasog sa pagpabaskog kag pagpalapad sang Bagong Hukbong Bayan bilang armas sang pumuluyo agud lubos nga tapuson ang sistemang nagapigos kag nagahimulos sa ila. Rekruton ang pinakadamo nga mamumugon, mangunguma, mala-proletaryado, mangingisda, mga petiburges nga intelektwal agud magserbe nga mga Pulang hangaway kag mga kumander sang Bagong Hukbong Bayan.

Sa atubang sang grabe nga kapintas kag brutalidad sang nagahari nga rehimen, malig-on ang panindugan sang BHB nga ipakig-away ang kaayuhan kag kinamatarung sang masa, kag ang ila makatarungan kag pangmalawigon nga handum kag interes. Indi matiplang ni Marcos ang mga rebolusyonaryong pwersa bisan magsuksok pa ini sang maskara sang “kalinong” agud taguon ang pasistang bangkil. Hugot nga uyatan sang mga Pulang hangaway ang ila mga armas. Handa sila nga makig-away para sa pumuluyo tubtob may dugo nga magatagas. Determinado sila nga isulong ang inaway banwa tubtob sa kadalag-an.