Usigen ni Sara Duterte. Nagprotesta iti Senado idiay Pasay City dagiti progresibo a grupo idi Hunyo 3 tapno umawag a rugyanen ti naigagara a naitantan a panangusig iti kaso ti impeachment ni Vice President Sara Duterte. Binatikos da ti panangitantan babaen ti adu a palusot ti Senado tapno rugyan daytoy. Idi pay Pebrero a naisumite ti House of Representatives dagiti artikulo ti impeachment.

Agsusumbangir metten ti panagbatikos iti Senado gapu iti panaglabsing daytoy uray iti Konstitusyon 1987 gapu iti panangitantan iti panagusig. Kabilang ditoy dagiti propesor ti University of the Philippines College of Law. Kabayatanna, naituding a mangisayangkat ti nasaknap a protesta inton Hunyo 11, aldaw ti panagdengngeg ti Senado iti impeachment, ti nadumaduma a grupo iti panangiyuna ti Taumbayan Ayaw sa Magnanakaw at Abusado Network Alliance (TAMA NA).

Laban mangngalap. Nagisayangkat ti fluvial parade wenno parada dagiti bangka ti Pamalakaya ken Save Laguna Lake Movement idiay Muntinlupa City idi Mayo 31, nailyan nga aldaw dagiti mangngalap, tapno ipanawagan ti panangibasura iti managdadael a Laguna Lake Roadshore Network Project ken 2,000-ektarya a floating solar power project idiay Laguna de Bay.

Idi Mayo 30, sangsangkamaysa a nagmartsa ti mano gasut a mangngalap, dagiti tagasuporta ken salaknib ti law-ang agturong iti Mendiola idiay Maynila. Immawag da ti panangsalaknib iti karbengan dagiti mangngalap, panangsupyat iti reklamasyon ken panangbawi iti desisyon ti Korte Suprema kanaig iti 15-kilometro a municipal waters.

Hustisya para ken Junver. Nagitugkel ti kandila dagiti estudyante ti University of Santo Tomas iti kampus daytoy idiay Manila idi Mayo 29 kas panawagan ti hustisya iti pannakatay ni Junver Toledo, 22, kapada da nga estudyante. Naiyulat ti panagpakamatay ni Toledo, maysa nga estudyante iti UST College of Rehabilitation Sciences idi Mayo 17 gapu iti presyur iti panagadal.

Ruk-atan dagiti balud-pulitikal. Nagisayangkat ti piket-protesta ti Karapatan-National Capital Region iti sango ti Quezon City Hall of Justice idi Mayo 20. Panawagan da a dagus a wayawayaan ken ibasura dagiti kaso nga illegal possession of firearms and explosives laban kadagiti unyonista a da Mark Ryan Cruz, Romina Astudillo ken Jaymie Gregorio, a paset ti Human Rights Day 7. Naituding ti panagdengngeg iti didiay nga aldaw ngem saan a natuloy ken balbaliw a naiskedyul inton Agosto gapu ta saan a nakasangpet ti ukom gapu kano ta “nakabakasyon.”