Manipud idi balbaliw nga agtugaw ni Donald Trump bilang presidente ti US daytoy Enero, awan-sarday ti nasaknap a panag-atake, panagkamat, inkapilitan ken arbitraryo a panangpatalaw wenno deportasyon kadagiti mangmangged nga imigrante idiay US. Manipud Enero agingga Mayo ket dimmanonen ti nasurok 271,000 nga imigrante ti inpadeport ti administrasyon bayat a saan a bumaba ti 49,184 nga imigrante ti madama a nakadetine iti nadumaduma a pasilidad ti Immigration and Customs Enforcement (ICE) iti US.

Segun iti embahada ti Pilipinas ken basar kadagiti kaso nga iggem ti Tanggol Migrante, mapatta-patta a saan a bumaba iti 30 Pilipino nga imigrante ti naiyulat a naipadeport tatta a tawen. Saan a maala ti eksakto a bilang dagiti nakadetine wenno indeport ti ICE gapu ta awan ti ipabpablaak daytoy nga impormasyon.

Adda iti 150,000-370,000 ti Pilipino nga awanan dokumento wenno iligal nga agin-indeg idiay US.

Segun iti Bayan USA, saan nga umanay ti ar-aramiden nga aksyon ti embahada ti Pilipinas iti US ken dagiti konsulado daytoy para kadagiti Pilipino nga imigrante a nakakulong ken nakaituding a mapaawid. Nalabes ti panagbaybay-a ken kinaawan-pakibiang da kadagiti Pilipino nga imigrante nga agsapsapul ti tulong. Uray ti ayuda nga Assistance to the Nationals Fund ti embahada ket naipaidam kadagiti agkasapulan.

Iti sango ti panagbaybay-a ti rehimen US-Marcos, agtultuloy ti panagkampanya ken panag-organisa dagiti organisasyon iti US iti panangiyuna ti Tanggol Migrante, dagiti alyado nga organisasyon ken dagiti Pilipino iti komunidad. Nagisayangkat da ti nadumaduma nga aktibidad kas ti press conference, rali, panagbisita kadagiti nakabalud, panangipatulod ti surat kadagiti korte ken panagkalap ti donasyon para iti madagdagus a pannakaruk-at dagiti naibalud ken panangtulong kadagiti pamilya da.

Gapu iti sangsangkamaysa a tignay dagiti umili iti US, naaramid da a mapawayawayaan ni Michelle (saan a pudno a nagan na) idi Abril 30 ken ni Lewelyn Dixon idi Mayo 29, agpada a naidetine iti NorthWest ICE Detention Center (NWDC) idiay Tacoma, Washington.

Madama pay laeng a nakadetine da Maximo Londorio, Rodante Rivera, Ligaya Jensen ken Alma Bowman, agpapada a residente a manon a dekada iti US.

Immawag met dagiti demokratiko nga organisasyon iti US para iti madagdagus nga aksyon manipud iti gubyerno ti Pilipinas. Kunada, nasken daytoy nga ikkan ti naan-anay a suporta ti amin nga imigrante, karaman dagiti sumangsango iti deportasyon, trafficking wenno panagtakaw ti sweldo. Immawag da met ken Ambassador Jose Manuel Romualdez a bumaba laengen iti pwesto nu saan na a kabaelan nga ipatungpal ti trabaho na a salakniban dagiti Pilipino idiay US.