Agtultuloy nga umun-uneg ken kumarkaro ti panagsagaba ti umili a Pilipino gapu kadagiti programa ken patakaran ti rehimen Marcos a kontra-marigrigat, kontra-umili ken pabor iti dadakkel a kapitalista a gangannet ken dagiti lokal nga ahente da, dagiti apo’t daga ken burukrata kapitalista.

Agpappapas ti pamilya a Marcos, dagiti kroni ken alipures na iti pondo ken pribilehiyo ti gubyerno, bayat nga agsusuwek ti biag ti mayorya dagiti Pilipino. Awan pannakabannog nga agtrabtrabaho dagiti mangmangged ken masa nga anakling-et. Palalo nga agkurang ti tangdan ken sweldo iti sango ti agtultuloy a panagtayok ti presyo ken dagiti babayadan. Minilyon ti awanan trabaho. Nakabasbassit a sapul a lumablabas laeng iti dakulap ti masa nga agrigrigat. Umad-adu ti kumkumpet iti patadem tapno laeng adda ti maipakan da kadagiti annak da.

Kagurgura la unay ti umili ti rehimen Marcos iti kinaawan panangisakit daytoy iti masa nga agsagsagaba iti kinakurapay, ken iti panangpakaro daytoy ti krisis iti pagbiagan ken panagrigat ti umili. Agintutuleng ni Marcos iti nasaknap nga awag ti umili. Saan na nga ikaskaso ti pukkaw ti nalawa a masa para iti makabiag a tangdan ken sweldo, trabaho, pudno a reporma iti daga, karbengan iti kadanuman, panangpadakkel ti badyet para iti libre a serbisyo iti gimong ken tapno palawaen ti lokal a produksyon ken dadduma pay a nairut a kadawatan.

Ketdi, makumikom ni Marcos kadagiti pammarang a pabuya nga awan ti ituntunda na a gin-awa iti umili, kas ti dakkel a drama ti panangbalasa iti gabinete (a taltallo laeng met ti sinukatan na), panangipasindayag iti ₱20 kada kilo a bagas (a malaksid a sumagmamano laeng ti nagnumar ket pangmabiitan laeng), libre a lugan iti LRT (nga uppat nga aldaw laeng) ken nu anya pay dita nga ubbaw a gimik. Tapno pusipusen ti ulo ti umili, agiruruar ni Marcos ken dagiti upisyal na kadagiti estadistika tapno kaluban ti agtultuloy a panagkaro ti krisis iti ekonomya, panagngato ti presyo dagiti gagatangen ken ad-adda pay a pannakatennag iti kinarigat ti minilyon a Pilipino.

Nakapalpalalo ti panangrabngis ti rehimen Marcos iti karbengan ken pagbiagan ti masa nga anakling-et. Tapno guyugoyen dagiti kapitalista nga agpupuonan, ilanlansa ni Marcos ti sweldo dagiti mangmangged tapno gundawayan ti nalaka a pigsa’t tegged da. Iti kaaw-awayan, ar-aramaten ni Marcos ti pasista a militar tapno wayaan ti nasaknap a panagkamkam ti daga para kadagiti plantasyon ken operasyon a panagminas, a mangpadpadisi iti ginasut a ribo a mannalon ken dagiti katutubo nga umili manipud iti daga da. Maag-agawan ti pagbiagan dagiti mangngalap, dagiti drayber ti dyip ken dadduma pay a babassit nga agsapsapul. Iti nagan ti panagsalimetmet, balak ni Marcos a kissayan ti empleyado ti gubyerno nga ad-adda a mangpadakes iti serbisyo a pangpubliko.

Parigat ngaruden iti umili, agtultuloy pay nga ikabkabil ni Marcos iti peggad ti kinatalged ti pagilyan, gapu iti bulag a panagsurot na kadagiti diktar ti amo na nga imperyalista a US. Agpapausar ni Marcos iti Indo-Pacific Strategy ti US tapno palikmutan ken lapdan ti panagpigsa ti China. Umad-ado nga umad-ado dagiti base militar ken pasilidad ti US iti Pilipinas tapno agistasyon ti rinibo a tropa nga Amerikano iti nadumaduma a paset ti pagilyan. Ipagpaguyod ni Marcos ti Pilipinas iti gubat a kayat ti US a pabettaken, iti awan-ressat a panangisayangkat kadagiti panagsanay ken panagsagana iti gera, ken panagimbak ti umad-ado nga umad-ado a napipigsa nga armas a panggubat ti US nga isirsirig na iti karibal daytoy a China.

Gapu iti panangparigat ken panangtraydor iti umili, ad-adda a maisinsina ti agar-ari a rehimen iti umili a Pilipino. Iwaswasiwas ni Marcos ti Memorandum Circular No. 83 tapno sirurungsot nga imula ti pasista a teror tapno pawilan ti panaglaban ti umili. Ngem saan a malapdan ni Marcos ti panagabante ti militante a tignay masa gapu ta adda iti likod daytoy ti kaadwan nga umili a determinado a gibusan ti panagbisin ken pannakaikuspil.

Konkonsolidaen ni Marcos ti poder na iti panangdutok ti nasurok 200 heneral iti AFP ken dagiti baro a tauhan kadagiti kumpanya nga iggem ti gubyerno, bayat a wagwagwagen daytoy ti krisis iti pulitika iti sango ti agtultuloy ken kumarkaro a binnusor dagiti agriribal a bunggoy.

Iti gagem nga agtalinaed iti poder ti pamilya da, panggep ni Marcos a parmekenen dagiti Duterte tapno lapdan ti plano ti karibal na a makasubli iti poder inton 2028. Ngem arig na pagay-ayaman na ti umili iti panangitantan dagiti alipures na iti Senado iti panaglitis iti impeachment kontra ken Vice President Sara Duterte, pakakitaan ti panag-iinnareglo dagiti bulok a reaksyunaryo a bunggoy. Napaspas nga agramramaram ti apoy ti pungtot ti umili kadagiti gandat a lapdan ti panaglitis ken panangpasungbat ken Sara Duterte iti pananggastar ti kwarta ti umili ken dadduma pay a nadadagsen a basol iti umili.

Awan ti itunda a gin-awa ti burukrata kapitalista, pasista ken aso-aso a rehimen Marcos iti biag ti umili a Pilipino. Iti tengnga ti tumadtadem a krisis, awan ti pagpilyan ti masa nga agrigrigat ken maidadanes nu saan a makidangadang. Idurduron ti sitwasyon dagiti mangmangged, mannalon, malaproletaryado ken dadduma pay a maidadanes a dasig ken sektor nga agkaykaysa tapno ilaban ti pagbiagan ken dagiti demokratiko a karbengan da, ken iturong ti pungtot ken protesta da iti rehimen Marcos, iti imperyalismo a US ken dagiti pasista a gamat daytoy.

Kadagiti pabrika, komunidad, iti nadumaduma nga ili ken prubinsya, tuduen dagiti madagdagus a parikut ken panawagan ti masa. Iti basaran, buklen ti solido a pigsa ti masa iti langa dagiti unyon ken dagiti timpuyog ken ingato ti kamulatan da. Agmartsa wenno agrali tapno ipakita ti nasaknap a panagkaykaysa da ken paawengen ti pukkaw da. Papigsaen wenno itakder dagiti sangay ti Partido ken dagiti limed a rebolusyonaryo nga organisasyon ti masa tapno agserbi a landok a bugas ti nalawa a masa. Tarabayan isuda iti dangadang da ken ingato dagitoy iti panaglaban iti agar-ari a rehimen Marcos.

Rumbeng nga agpursigi iti panangpapigsa ken panangpalawa iti New People’s Army kas armas ti umili tapno naan-anay a gibusan ti sistema a mangidaddadanes ken manggungundaway kadakuada. Rekruten ti kaadwan a mangmangged, mannalon, mala-proletaryado, mangngalap, dagiti petiburges nga intelektwal tapno agserbi a Nalabbaga a mannakigubat ken kumander ti New People’s Army.

Iti sango ti todo a kinaranggas ken brutalidad ti agar-ari a rehimen, natibker ti takder ti NPA nga ilaban ti pagimbagan ken karbengan ti masa, ken dagiti nainkalintegan ken pangmabayagan a tarigagay ken interes da. Saan a maal-allilaw ni Marcos dagiti rebolusyonaryo a pwersa uray pay agisuot ti maskara a “kapya” tapno ilemmeng ti pasista a pangil na. Nairut a pangiggeman dagiti Nalabbaga a mannakigubat dagiti armas da. Nakasagana da a lumaban para iti umili agingga iti maudi a tedted ti dara da. Determinado da nga iyabante ti gubat ti umili agingga’t balligi.