Nagtitipon idiay Nairobi, Kenya idiay Africa idi Mayo 23-24 ti 110 indibidwal a mangibagbagi iti 28 partido a proletaryo-sosyalista, pormasyon nga anti-imperyalista, organisasyon iti panagsukisok ken progresibo a tignay ti umili manipud iti 20 pagilyan iti lima a kontinente para iti maysa a teoretikal a kumperensya. Iti panangiyuna ti National Democratic Front of the Philippines (NDFP) ken ti Communist Party Marxist Kenya (CPMK), nagbalin a naballigi ti kumperensya a nangtalantan iti burukrata ken kumprador a kapitalismo kadagiti neokolonya.

Ti kumperensya a napauloan a Sangalubongan a Kumperensya a Teoretikal Kanaig iti Kumprador ken Burukrata Kapitalismo kadagiti Neokolonya, ti maikapat iti serye dagiti kumperensya nga insayangkat ti NDFP a mangtaltalantan iti napapateg nga usapin iti teorya. Daytoy ti umuna a kumperensya a naisayangkat idiay Africa. Natalantan iti kumperensya ti 21 artikulo a sinurat dagiti komunista ken proletaryo-sosyalista a partido ken dagiti anti-imperyalista nga organisasyon a mangidadaulo iti tignay para iti wayawaya idiay Congo, Cyprus, Guatemala, Indonesia, Iraq, Ireland, Kenya, Kurdistan, Nepal, Pakistan, Palestine, Pilipinas, Sudan, South Sudan, Turkey, Uganda ken Zambia.

Ti dua-aldaw a kumperensya ket nagserbi a gundaway para iti panangilanad ti Marxista-Leninista a panagamiris iti agraraira a moda ti produksyon iti nadumaduma a pagilyan. Partikular nga inamiris ditoy ti istorikal a panagdur-as dagiti neokolonyal a gimong iti sidong ti kontrol ti imperyalismo.

Inamiris dagiti delegado ti kumperensya ti materyal a ramut ti burukrata kapitalismo ken kapitalismo a kumprador, basar kadagiti sinurat da Lenin ken Mao kanaig iti malakolonyal ken malapyudal a panagari, kasta met kadagiti iskema ken addang ti imperyalismo a US tapno mapatalinaed ti kontrol kadagiti neokolonya.

Napagadalan met ti papel ti nadumaduma a dasig kadagiti neokolonya kas lokal nga ahente ti pananggamrud iti ekonomya ken panagbalin a paspasurot iti pulitika ken militar iti nagan ti interes ti imperyalismo. Nakipaset dagiti delegado iti nauneg a tinnalantan tapno mapaadalem ken makisinnukat ti panagamiris kadagiti kundisyon a nangiyanak kadagiti istruktura ti kagimongan a malakolonyal ken malapyudal kadagiti pagpagilyan da.

Natalantan met dagiti praktikal nga usapin nga addaan pakainaigan na iti rebolusyonaryo a trabaho ken panangiyabante kadagiti tignay ti umili, nangruna iti konteksto ti burukrata kapitalismo. Inamiris dagiti delegado dagiti estratehiya para iti panag-organisa kadagiti partikular a dasig ti kagimongan, kas ti malaproletaryado ken napagadalan nu kasano a panpandayen ti kumarkaro a sangalubongan a krisis ken umun-uneg nga imperyalista nga agresyon ti panagdur-as dagiti pwersa a rebolusyonaryo, ken ti nalawlawa a tignay Kannigid kadagiti pagilyan ken rehiyon da.

Ti artikulo a naibingay manipud iti Pilipinas ket sinurat ti Komite Sentral ti Communist Party of the Philippines. Sinublian ti artikulo ti pakasaritaan ti panagtaud ti kumprador ken burukrata kapitalismo iti pagilyan a resulta ti panagari ti imperyalismo a US babaen ti ahente daytoy iti ekonomya ken pulitika. Naipalawag met ditoy ti papel ti kumprador ken burukrata kapitalista tapno pagtalinaeden ti malakolonyal ken malapyudal a gimong a Pilipino.

Iti panaggibus ti kumperensya, nagipeksa ti pannakikaykaysa dagiti delegado iti narambakan nga African Liberation Day idi Mayo 25 kas pananglagip iti pannakabuangay ti Organization of African Unity a nagbalin nga African Union. Nabuangay ti OAU tapno iyabante ti panagkaykaysa ken panagtitinnulong dagiti anti-kolonyal a tignay para iti wayawaya ken dagiti timmaud a baro nga independyente a gubyerno iti 30 pagilyan nga African idi dekada 1960.

Minarkaan da daytoy kas paset ti komun a dangadang dagiti maidadanes nga umili laban iti imperyalismo ken amin a reaksyon. Pinasingkedan ti kumperensya ti pannakikaykaysa dagiti pwersa nga anti-imperyalista ken proletaryo-sosyalista iti agtultuloy a kinapateg dagiti tignay para iti wayawaya iti Africa a paset ti nasaksaknap a dangadang para iti bukod-a-pangngeddeng ken sosyalismo.