Dua a sibilyan iti Negros ti naiyulat a natay gapu iti panagriribuk ti militar kadagiti komunidad da idi Mayo. Kabayatan na, tuloy-tuloy ti panagabuso dagiti soldado idiay Albay, Masbate, Bohol ken Metro Manila.

Idiay Negros Occidental, naiyulat a natay ti maysa a babai a ni Lolita Reman iti Sityo Toril, Barangay Bandila, Toboso idi Mayo 20, gapu iti nalabes a buteng ken troma kadagiti operasyon ti 79th IB iti lugar. Rinaut ken rinansak dagiti soldado ti 79th IB ti balay ti pamilya Mahusay nga ayan ni Reman.

Kastoy met laeng ti napasamak idiay Barangay Minapasok, Calatrava. Inatake ti stroke ti mannalon a ni Boyet de Asis idi Mayo 23 gapu iti panagpangpangta kenkuana ti pito a soldado ti 79th IB ken dagiti traydor a da Marlon Basalo (Elan) ken alyas Jonel/Mike iti Sityo Kapanuya.

Idi Mayo 31, pwersado a sinerrek ken rinansak dagiti soldado ti 79th IB ti balay ti agassawa nga Alejandro ken Maricel Villamero iti Sityo Manaysay, Barangay Cambayobo, Calatrava. Tinakaw dagiti soldado ti nasurok ₱7,000 a nabayag nga inurnong a kwarta ti agassawa.

Idiay Masbate, inpasidong iti naulpit nga interogasyon dagiti soldado ti 96th MICO ti 12 sibilyan manipud iti Uson, Masbate idi maudi a lawas ti Mayo. Pilit a papaaminen dagiti soldado dagiti nasao a sibilyan nga adda ti silpo da iti NPA. Kimmaro ti sakit ti maysa kadagiti biktima kalpasan ti interogasyon ken narigatan daytoy nga agsao kalpasan a maatake iti sakit iti puso ken diabetes gapu iti buteng ken troma.

Idiay Negros Oriental, sinarungkaran dagiti soldado ti balay ti mannalon a ni Alan Garde iti Barangay Sandayao, Guihulngan City idi Mayo 15. Pilit a papaaminen dagiti soldado ni Garde nga addaan silpo ken sumupsuporta isuna iti NPA. Iti didiay met laeng nga aldaw, sinerrek ken rinansak dagiti soldado ti balay ni Rocky Fat. Pinaruar dagiti soldado nga adda nakumpiskar nga armas manipud kenkuana ken ginandat da a tiliwen ngem timmakder ti pamilya na kontra ditoy.

Manipud Mayo 3, inpasidong ti 83rd IB iti arig na martial law a panagari iti tallo a barangay iti Caramoan, Camarines Sur. Hinaras, pinangtaan ken pinabasol dagiti militar dagiti residente ti komunidad, partikular ti innem nga indibidwal, a kakabagyan wenno tagasuporta kano ti NPA. Ti sumagmamano kadagiti biktima ket pilpiliten ti militar nga iruar ken “isuko” dagiti assawa da a mapabpabasol a Nalabbaga a mannakigubat. Mano a daras met a pwersado a sinerrek dagiti soldado ti balbalay ken iligal nga al-alaan da ti litrato dagiti residente.

Idiay Northern Samar, inpasidong iti hamlet ti AFP dagiti barangay iti Catubig, Las Navas, Gamay, Mapanas ken Palapag manipud idi Hunyo 4. Inpataw daytoy ti militar kasaruno ti kunkunada nga engkwentro ti AFP iti NPA iti didiay nga aldaw iti Barangay Nagoocan, Catubig. Maparparitan a rumwar ti baryo dagiti residente uray pay iti bukod da a talon, kaabay a baryo wenno iti ili da laeng a mapan. Sakbay daytoy, nasaknap ti panangpwersa ti militar kadagiti residente iti ili ti Palapag a “pasukuen” dagiti kapamilya da a mapabpabasol a mannakigubat ti NPA.

Panag-aresto ken panagipila ti pinarbo a kaso. Naaresto iti kaso nga illegal possession of firearms and explosives ken napabasol a kameng ti NPA ni “Ruben”, 47, mangmangged iti konstruksyon ken residente ti Barangay Namantao, Daraga, Albay. Dinukot isuna dagiti elemento ti 31st IB iti balay na idi Mayo 23 ken inpanda iti maysa a bakante a balay. Nagpaputok ti paltog dagiti soldado tapno paruaren nga adda ti engkwentro.

Idiay Bohol, nagiwaras ti peke a damag ken impormasyon ti CIDG idi Mayo 23 laban ken Carmilo Tabada, konsehal iti maysa a barangay iti ili ti Trinidad. Pinabasol da nga upisyal iti pinansya ti CPP ken kunkunada nga inaresto da isuna gapu iti kaso a “terrorism financing.” Inlawag ni Tabada nga isuna mismo ti immasideg iti korte ken nagpyansa kanaig ti kaso.