Pinadayawan ti Communist Party of the Philippines ni Kadwa Basavaraju (Nambala Keshava Rao), kabuklan a kalihim ti Communist Party of India (Maoist), a namartir karaman ti 27 pay a kakadwa idi Mayo 21. Pinatay isuda dagiti pwersa ti estado ti India iti naawagan a Masaker iti Gundekote, iti Abhujmad iti distrito ti Narayanpur idiay Chhattisgarh, India.

Rumimrimat tatta ti nagan ni Kadwa Basavaraju iti intar dagiti immortal a banwar ti epiko a gubat ti umili iti India ken dagiti rebolusyonaryo a dangadang para iti nailyan a wayawaya ken sosyalismo iti intero a lubong. Pinangiggeman na ti silaw ti armado a dangadang idiay India ken nagserbi a lawag iti dana ti sangalubongan a rebolusyon a proletaryo, nangruna kadagiti napalabas a dekada dagiti pannakapaay ken pannakaabak dagiti pwersa a sosyalista iti nadumaduma a paset ti lubong.

Siasino ni Kadwa Basavaraju?

Naipasngay ni Kadwa Basavaraju idi 1955 iti pamilya dagiti mannalon iti komunidad ti Jiyannapetta iti distrito ti Srikakulam, Andhra Pradesh nga adda iti abagatan a daya ti India. Nagadal isuna ti elementarya ken hayskul iti distrito da ken nagturong iti syudad ti Warangal iti kaabay nga estado ti Telangana tapno agadal ti inhinyeriya iti kolehiyo.

Bayat nga adda iti kolehiyo, nariing isuna iti kasasaad ken dangadang ti umili nga Indian a makagapu ti pannakipaset na iti tignay estudyante. Idi dekada 1980, nagbalin a paset ken nagakem isuna ti kangrunaan a rebbengen iti CPI (Marxist-Leninist) People’s War. Nagbalin a kameng isuna ti komite sentral ti partido idi 1992.

Idi 2004, kabilang isuna kadagiti nangiyuna iti panagtipon ti CPI (ML) People’s War ken Maoist Communist Centre of India (MCCI) tapno buklen ti CPI (Maoist). Maysa isuna a nangbuangay iti hukbo ti umili ti India a People’s Liberation Guerilla Army (PLGA) idi 2000. Indauluan na daytoy iti nabayag a panawen ken nangiyuna iti adu a balligi iti panangbukel kadagiti rebolusyonaryo a base ken panangisayangkat kadagiti taktikal nga opensiba laban kadagiti pwersa a pasista.

Nagserbi isuna a kameng ti Komite Sentral iti unos ti 33 tawen ken ti Politburo iti unos ti 25 tawen. Indauluan na iti nabayag a panawen ti Sentral a Komisyon ti Militar ti CPI (Maoist). Idi maudi a paset ti 2018, binotosan isuna ti Komite Sentral bilang kabuklan a kalihim ti CPI (Maoist) ken nangsukat iti panangidaulo ni Kadwa Ganapathy.

Awag para iti hustisya

Hustisya ti nagkaykaysa a pukkaw ti umili nga Indian ken dagiti internasyunal a partido ken organisasyon iti pammapatay ken Kadwa Basavaraju ken ti 27 pay a kakadwa. Naimaldit iti Masaker iti Gundekote dagiti panaglabsing iti internasyunal a makatao a linteg ken dagiti pagannurotan iti gubat.

Segun iti ulat ti Dandakaranya Special Zonal Committee ti CPI (Maoist), ti 27 a kakadwa a kameng ti CPI (Maoist) ken mannakigubat ti PLGA ket napatay iti panagkubkob ti rinibo a militar ken pulis ti reaksyunaryo nga estado iti kampo da. Inbunannag ti komite a kalpasan dagiti labanan ket sibibiag a nakemmeg ni Kadwa Basavaraju ken naigagara a pinapatay dagiti berdugo a tauhan ti rehimen Modi.

Ti brutal a Masaker iti Gundekote ket paset ti terorista a kampanya nga Operation Kagaar. Narugyan ti operasyon idi Enero 2024 nu sadinno a nagaramat ti rinibo nga armado a pwersa ti reaksyunaryo nga estado, nagitakder ti ginasut a detatsment militar ken nagipatungpal ti kampanya ti pammapatay ken terorismo laban kangrunaan kadagiti Adivasi, wenno katutubo ti India.

Iti agdama, idurduron ti nadumaduma a demokratiko nga organisasyon idiay India ti imbestigasyon iti Masaker iti Gundekote. Kayat da a pagsungbaten ti rehimen Modi ken dagiti upisyal militar daytoy iti narungsot a krimen.

Kabayatanna, inpeksa ti Komite Sentral ti CPP ti naan-anay a talek iti Komite Sentral ti CPI (Maoist) a dagus nga agpili daytoy ti maysa a mangidaulo a kas kalaing ni Kadwa Basavaraju tapno akemen ti ineggaman na a responsibilidad. Kuna ti mangidaulo a komite, kumpyansa daytoy iti panagtipon ti kaamuan dagiti natataengan a kadre ken ti regta ken sirib dagiti agkabanwag a kadre, marimbawan ti CPI (Maoist) ti amin a pannubok, agtuloy iti dana ti rebolusyonaryo nga armado a dangadang, ken aggun-od ti dakdakkel pay a balligi iti gubat ti umili iti India.